السبت، 29 ديسمبر، 2007

تاج رحيل



أول مره أرد على تاج
بس نعمل ايه بقه
حكم القوي
مقدرش ارفضلك تاج يارحيل
استعنا على الشقى بالله

لو مكنتش مصرى بس عربى كانت هتبقى ايه نظرتك للمصرين واللى بيحصل فى مصر دلوقتى؟

اعتقد اني هكون من الفئه العربيه اللي مازالت بتحترم المصريين
واللي المصريين في نظرها هما المصريين الجدعان
اللي ساعدوا وعلموا و مبخلوش لا بمال و لا بدم..
واللي بيحصل في مصر ازمه زي اللي بتمر بيها دول عربيه اخرى مسيرها تنقشع
ــــــــــــــــــــــــــــــــــــــــــــــــــــــــــــــــــــــــــــــــــــ
لو كنت اوربى او غير مسلم هتبقى ايه نظرتك للعرب والمسلمين؟
باعتبار ان الميديا عماله غسيل مخ معتبر
واحنا الميديا بتاعتنا معملتش اي رد فعل يفيد
فاهتكون نظرتي للاسف
انهم مجموعه رعاع متخلفين
ارهابيين همجيين
متعطشيين للدماء
و مجرد مستهلكين للعلم وليسوا منتجين له
ــــــــــــــــــــــــــــــــــــــــــــــــــــــــــــــــــــــــــــــــــــ

قالوا لك انك بقيت رئيس جمهورية هتعمل ايه؟
وضع دستور جديد مبني على الواقع ويحترم الحقوق و الحريات واهمها
حرية انشاء الاحزاب
و الصحف
و انشاء نظام تعليمي حقيقي في مصر يتبناه احمد زويل
البدء في مشروع ممر التعمير الخاص بفاروق الباز
تنفيذ مطالب نادي القضاه
والبدء في استرداد املاك المصريين وتفعيل قانون
" من أين لك هذا ؟ "

ــــــــــــــــــــــــــــــــــــــــــــــــــــــــــــــــــــــــــــــــــــ
لو سمح لك برؤية الرسول صلى وانك هتقول كلمه واحده؟
هقوله احنا محتاجينك جدا
ــــــــــــــــــــــــــــــــــــــــــــــــــــــــــــــــــــــــــــــــــــــ
لو كنا فى عصر اذدهار الاندلس كنت تتخيل نفسك ازاى؟
مسؤل عن مكتبه من مكاتب المدينه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لو خطبت واحده او اتخطبتى لواحد واثناء الخطبة اكتشفت او اكتشفتى ان الطرف الاخر غير قادر على الانجاب هيكون ايه تصرفك؟
هاكمل معاها لكن هاستاذنها اني اتزوج تاني
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لو طلعت على القمر هتكتب ايه؟
أرض فضاء ملك سامح
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لو مررت التاج لحد وماجاوبش هتعمل ايه؟
هاعيط
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تمرر التاج لمين؟
مش همرره عشان مليش نفس اعيط

الأربعاء، 12 ديسمبر، 2007

قضينا تلت المده



بما ان في الغالب متوسط اعمار الناس حوالي 70
فانهارده انا قضيت تلت مدتي على الكره الارضيه

بقالي 24 سنه عايش على الارض
يااااااااااااااه عمر طويل
لما الواحد يحسب برضه انه بينام بتاع 8 ساعات يوميا يعني تلت اليوم برضه
مش عارف ايه حكاية التلت دي :)
فبحسبه بسيطه سيادتي نمت 8 سنين كامله خلال ال 24 سنه دول
ياجماعه اي حد قسم رياضه يحسب ورايا عشان انا مش مقتنع
8 سنين نمتهم !!
لمأ أفكر في تقييم الفتره اللي فاتت هالاقي ان دا السن اللي المفروض ان الدنيا بتبني الانسان فيه
والفتره اللي جايه هيه اللي المفروض ادي الدنيا فيها
طب انا هادي الدنيا ايه
شغل في مجال معين بيفيد فئه معينه على نطاق محدود..
ولا اجوز واخلف عيلين تلاته وابقه كده ساهمت بدوري في منظومه اعمار الارض..
طب وبعدين .. ما الاف البشر عملوا كده
هيه دي اخرة الدنيا نشتغل ونخلف ونموت
اه فيه ناس عظيمه عملوا اختراعات واشتهروا على مستوى العالم
لكن معتقدش ان ممكن الامور تتطور وتوصل إني اختراع حاجه :)
بس مع ذلك انا مش راضي بالمستوى العادي دا من الدنيا
انا ملاحظ ان كلامي في مستوى عالي شويع من المثاليه.. اعذروني بس الواحد فينا بقا بيكتب مش
عارف القلم هايوديه فين..
طيب بلاش مثاليه
ارض الواقع بيقول
ان اصلا اللي يقدر يشتغل الوقتي في مصر
ويجوز ويخلف ويربي عياله
هايبزل مجهود وتفكير وحرق اعصاب وسهر ليالي مسهرهمش اللي اخترع القنبله الذريه
دا الشغل والزواج الوقتي في مصر ولا الجهاد في سبيل الله
بقه من ضمن الاحلام مع انه ابسط الحقوق العاديه
اللي الطبيعي انها تكون متوفره عشان تخش بقه في المرحله اللي بعديها
مرحله الانتاج الابداعي و التفكير على مستوى اعم واشمل من مجرد تلبيه احتياجاتك..
انا خايف لو ربنا امد لينا وليكم وطول في عمرنا
بعد 25 سنه نتقابل في بوست زي دا
و الاقي نفسي بكتب نفس الكلام عن اني مش عاوز مجرد اني اجوز واشتغل وعاوز اعمل حاجه مفيده..

لا يبقه الحق اعملي حاجه مفيده واجوز عشان بعد 25 سنه لو ملحقتش اعملي اللي في دماغي يبقه فيه امل
في اولادي انهم يعملوا اللي معملتوش..
سؤال على الماشي
انت بتحسب عيد ميلادك
على أساس اليوم الي اتولدت فيه
ولا اللي مكتوب في شهاده الميلاد ؟؟

السبت، 8 ديسمبر، 2007

القلب مستودع الذكريات


اختلفوا أين يوجد الحب

وأين تستقر الذكريات

أفي طيات العقل ؟

أم بين دقات قلب يعشق الخفقان؟

قال البعض الحب في القلب و العشق عشق قلب لقلب

وقال اخرون إذا بدلت قلب مكان قلب سيظل الحبيب ملؤ العقل و القلب

-----------

فعلا هذا جدل موجود ولكل رأي هناك مؤيدون

وفي برنامج شاهدته على الجزيرة الوثائقية أمس بنفس العنوان

كان رأي أطباء جراحة القلب أن القلب مجرد مضخة وفقط..

وعلى النقيض ذكروا عدة أمثلة لحالات تم زرع قلب لها

وحدث فعلا تغيير طفيف في الشخصية

فاصبحوا يحبون موسيقى معينة وأطعمة معينة لم يألفوها من قبل أو يستسيغوها

وبالدراسه وجدوا عن التفضيلات الجديدة إنما هي كانت لدى صاحب القلب الأصلي ...

إن الأمر فعلا محير

في الوقت الذي في رأيي الشخصي أن المشاعر و الذاكرة

والحب كل هذا مرتبط ومخزون في العقل

إلا إنني لا أستطيع أن أنكر إحساسي بأن للقلب صلة كبيرة بالأمر

ربما يكون هارودير الحب والذاكرة في العقل

لكن السوفت ويير كله في القلب :)

----------

أكثر ما أسعدني للغاية هو رؤيتي للطبيب مجدي يعقوب

لما رأيته في البرنامج أحسست بفرحه مكتومه

ببصيص أمل في اخر النفق الذي نعيش فيه

وأحسست أيضا بأن المشكلة ليست فينا..

فمن خرجوا " خلعوا " أصبح لهم شأن ومكان

ومن كُبلوا وقُيدوا وأجبروا على السير ضمن

التروس الكئيبة و البطيئة و التي تسير أصلا للوراء تعرفون ما حل بهم

------

ربما هناك بارقة أمل.. طالما نحب

أيان كان مكان الحب كان العقل أم في القلب

فالحب دائما يعطيك سببا للحياة

السبت، 1 ديسمبر، 2007

عندما يكون الإنسان بلا قيمة

عندما يكون الإنسان بلا قيمة
عندها تنهار حصونه
و تموت جنوده
وينطفئ بريق الكبريـــــاء في عينيه
عندها يكون الزاد كالخناجر تقطع الأحشاء
عندها يكون الهواء ملوثا برائحة الندم
عندها يكون الماء مشبعا بطعم الألم
عندها تكون الحياة بلا معنى ولا هدف
عندها تبحر سفينة الخيال بلا مرسى
ويفر العقل بلا رجعة
و يشذ القلب بلا توبة
ويضيق الصدر بلا فرجة
و تموت المشاعر بلا بعثة
و يتوه الأمل بلا عودة
وساعتها يتمنى الموت ولو كان منه بعيد

الأحد، 25 نوفمبر، 2007

رنين الهرمونات



حاولت أن تمزق الطوق:

طوقٌ يحيط بالرغبات

تَربتْ على أن تكبت كل المكنون

ولكن ما يلبث الماء أن يفور،

تفقد السيطرة

تُمسك بالهاتف

وتجري اتصال..

إنه اتصالُ بالحبيب

تسأله عن الحال

وفي داخلها تريد أن تسأله المحال

إنها حبيسة رغبات

تريد أن تخترق المألوف

أن تبوح

بما يراود أي إنسان

بحق طبيعي يراد له أن يكون في طي الكتمان

أو على الأقل أن يكون بنظام

ولكن النظام قيد

والقيد يضيق ولا أمل في انفراج

تمر السنين

والعمر يفوت

والأدوات كادت تصبح غير صالحة للاستخدام

ما العمل ؟ وليس هناك عريس منتظر ..

وليس في الأفق بادرة أمل

والكلُ غير مبال

وكأن العادي أن يبقى البحر بلا أمواج،

أن يبقى الحب حبيس الجدران.

ولكنها ليست بغي

إنها تريد أن تكون مرغوبة،

وبضاعتها مطلوبة.

تحت ستار من الإحترام،

وغلاف يجمل الأمر ويبيح في غفلة من الزمن ما هو عار

إنه الحب

إنه مفتاح اللغز

إنه مبرر لكل فعل مشين

مبرر مقبول ولا يشين

فلنحب

ولنفعل بكل براءة ما نريد باسم الحب

ولنا العذر فنحن نحب..

اي خبل هذا ؟!

أهذا هو الحب ؟

قد يكون بعض الحب..

ولكن إذا أصبح هذا كل الحب

فحيونات الغاب فاقت قيس وليلى عشق

وقطط الشارع تجسد كل يوم أجمل قصة حب

تباً للهرمونات لقد أفسدت علينا حتى الحب

راحت عليك أيها القلب

أنت الأن تدق تدق

و الهرمونات ترن ترن


الأحد، 18 نوفمبر، 2007

إنتبه التلفزيون فيه إعلام قاتل




بالفعل لم نعد كالسابق...!!

كان خبر مقتل أحدهم يثير الرهبة في نفوسنا.. ولربما اقشعرت أبدان بعضنا.. وذرفت أمهاتنا الدموع..

لقد كنا نملك قلبا ذا شعور.. وعيونا تستجيب لشهقات الصدور .

أما الأن ....

الجزيرة .. مقتل 300 عراقي في انفجار سياره مفخخه

مزيكا .. روبي بتهز القاعده في أحدث فديو كليب

الحره .. القاعده تحذر امريكا بهجوم جديد

ميلودي .. مجموعه كليبات لفتيات يرقصون ويعرضون الصدور

الجزيرة.. صدور الوثيقة العربية لشجب وندب العدوان على المناطق المحتلة

العربية .. قوات الاحتلال تردي تسعة فلسطنين وتهدم بيوت أسرهم

دريم .. غرق عبارة مصرية ومقتل ركابها بعد أن احترقت بهم العبارة

زووم .. كن أول من يعرف من هو حبيب إليسا

الحره .. مجموعه من الشباب المصري هرب من المستقبل المظلم في مصر ليقبع في البحر المظلم على حدود ايطاليا

شخاليل .. لو عرفت واحد وواحد يساوي كام اتصل لتنضم للمسابقة

خلال ثلث ساعه سوف ترى ميزجا من القتل و العري وسفك والدماء وعرض اللحوم والبشريه سواء لحوم مظلومين قتلوا

او لحوم بغايا يستحقوا القتل..

وستجد أن جهاز المشاعر لديك لا يستطيع إيجاد وقت لكي يتأثر .. سواء بمنظر القتل أو بالأسى لمقتل شباب مصري أو حتى للإثارة من جسد عاري ..

زخم حسي و مشاعر متناقضة كلها تُرسل بشكل سريع ومتلاحق وخبر تلو الخبر وصورة تلو الفديو ..

وتصل لحالة من التبلد حيث كل شيئ يشبه كل شيئ ولا تملك رد فعل ..

وأستطيع أن أجزم أن أجهزة الشعور لدينا لو لم تتعطل لكنا مجانين

نقلب على قناة فنضحك وأخرى فنبكي وأخرى نثار و أخرى ...وأخرى..

لا نملك الأن إلا شعورا حياديا تجاه الأشياء

سواء كان صدور وثيقة شجب أو صدور فتيات عاريات ..

أصبح عري النساء موازي لعهر الحكومات مرتبط بفحش البغايا موصول بفُجر المسؤلين..

إنها حياة أصبح الكل يغتصب الكل

جيوش تغتصب شعوب

وعاريات يغتصبون عقول الشباب

والكل يرى و يسمع و يتحدث ولكن لا يحس ولا يشعر

تستقبل ولا ترسل

أصبحنا باهتين نرى كل الالوان لونا رماديا كبيرا ضخما هائل الحجم ليس له طعم ولا لون

حتى الخيار أصبح إما أخضرا بطعم البلاستك أو خيار استراتيجيا للسلام لا يساوي جنيهان..

الخميس، 15 نوفمبر، 2007

مدونتي دمعاتي


إن للدموع قوة

فالدمع ليس فقط يفرض نفسه على الحزن والفرح

ولكن حتى عندما يهتز كيانك .. عندما يحدث لك شيئ فوق احتمالك .. عندها تتسرب دمعات الحق على وجنتيك..

{وَإِذَا سَمِعُواْ مَا أُنزِلَ إِلَى الرَّسُولِ تَرَى أَعْيُنَهُمْ تَفِيضُ مِنَ الدَّمْعِ مِمَّا عَرَفُواْ مِنَ الْحَقِّ يَقُولُونَ رَبَّنَا آمَنَّا فَاكْتُبْنَا مَعَ الشَّاهِدِينَ }المائدة83

في هذا المشهد القرأني البديع

عندما عرفوا الحق فاضت اعينهم من الدمع

يالله ان للحق دموع !!

وهناك من البشر من تتحجر قلوبهم من كثره ظلمهم للناس وهؤلاء تجف عيونهم عن الدمع .. وهناك من يدمع دموع الغدر دموع التمثيل او كما يطلق عليها دموع التماسيح .. لا اعرف كيف يذرفونها وكيف تطيقها اعينهم ...

فعلا الانسان سر كبير ما نلبث ان نصل الى جواب فتظهر عشرات الاسئله..

والحقيقه ان الحزن في قاموسي ليس معناه الدموع.

فالدموع هي اخر مرحله من مراحل الحزن هيه التعبير المريح عن الحزن.. و الاقسى منها هوه ان تدمع بقلبك ولا تبتل عيناك..

فما اكثر اللحظات التي قد تريحك الدموع ولكن ببساطه لا تجدها

تتمنى ان تستريح وتدمع ولكن تضن عليك الدموع بقليل منها..

فربما كانت دماعتي نداء لها لكي تريني قليلا منها عند الحزن. و ان تكرمت وجاءتني تشاركني الفرح فسأكون شاكرا لها كل الشكر.

الاثنين، 12 نوفمبر، 2007

لا تتركيني






لا تتركيني ..



أقاسي مُرَ الحياةِ وتهجريني



لا تتركيني أشعر بالفراغ وبأنني في الكونِ بلا قلبٍ يحتويني



وأن أنفاسي تخرجُ ولا تعود فتحييني



اقتربت دموعي بعد أن كانت بعيدة من يوم عرفتيني



وأصبحت أخشى من الموت وأتشبثُ بالحياة لكي أناجيكِ



فأيام عمري تجمدت ومن غيرك يخلصها من الجليد



ودقات قلبي وقفت و أضحت تناديكِ



لا تتركيني وحدي لا أعرف وطناٌ يؤويني



لا تتركيني لنفسي أعاتبها و تشقيني



وللألم يعتصرني فلا أجد من يداويني



ولقلبي أحدثه فبالصمت يناجيني



هلا سألتك فتجيبيني أيكون للعمر معنى وأنتِ لستِ شريكاً فيه ؟



أيكون للحب عبير ولستِ أنتِ حبيبي ؟



فإن كنتِ تحبيني فلا تتركيني .



الأحد، 11 نوفمبر، 2007

اغتيال صرصار




لغاية اللحظه دي الصراصير من الحشرات المغضوب عليها
طبعا اي صرصار بيحسد الأمله اللي فيها الفيران بعد ما اترقت
وبقت تطلع في الفديو كلبيبات وايه نانسي عجرم تدلعها
كل الصراصير في ليله اطلاق هذا الكليب تمنت لو انها ولدت فئراناً..
ومقدرش الوم الصراصير انا اعرف بني ادمين اتمنوا انهم يبقوا فران..
بس المشكله اللي محدش من اللي بيتمنى دول واخد باله منها
انه يوم ما امنيته تتحقق ويتقلب فار مش ضروري يلاقي نفسه في حضن نانسي عجرم ..
طبيعي جدا ان يلاقي نفسه في بلاعه "
او يلاقي قط بقاله خمس ايام مكلش بيجري وراه..
فياجماعه الخير كل واحد يخلي باله بيتمنى ايه.. واللي مش مصدقني يشوف فيلم

Bedazzled

وقبل ما تدوروا على الفيلم وتشوفوه هحكيلكم على حكايه واحد صاحبي مع الصرصار


واحد صاحبي كان بيصلي ركعتين السنه في الجامع ..
وهوه واقف في الركعه الاولى لقا صرصار ماشي جنبه بيتجول.. محطش في دماغه
فجاه وعلى حين غره الصرصار طلع من رجل البنطلون
صاحبي افتكر الصحابي اللي كان بيصلي وهوه بيحمي الرسول عليه الصلاه و السلام و واحد من الكفار عمال يضربه بالسهام و الصحابي مستحمل ومكمل صلاه..
صحبي قرر يكمل صلاه لانه اتكسف من نفسه جدا مقارنه


بالصحابي مع محاوله تنفيض رجله من غير ما حد ياخد باله يمكن الصرصار يخرج تاني ..
المهم عشان ربنا يزود الابتلاء الصرصار شق طريقه متوجها الى اعالي قدم صاحبي


حيث وجد هناك ملاذ امنا ومستقر الى حين..
وهنا انهارت مقاومه صاحبي ونسى كل ما يتعلق بالصبر و السهام و الصحابي الجليل
وخرج من الصلاه وجري على الحمام
خلع البنطون في حركه رشيقه
ونفضه جيدا
نزل الصرصار بيجري
صاحبي قال والله ما انا سايبك يا ابن .........
وجري وراه بالشبشب فأرداه قتيلا
..


ودي كانت نهاية حياة هذا الصرصار
الفتحه على روحه بقه



الثلاثاء، 6 نوفمبر، 2007

بلوج النكد

بلوج النكد يرحب بكم
بكم دا حاليا هوه أنا
بما ان مفيش غيري أنا
واعوز بالله من كلمة انا عشان انا مش بحب اقول انا كتير
اي حد في نفسه دمعتين عاوز يعيطهم هنا المكان المثالي لك
وبما اني ممن يفعلون ما يقولون
فهابدأ بوصلة العييط الاولى

استنوا

من اجل الحرص على مشاعر اخواننا اللي الحياه عندهم قشطه
و الدنيا في اللذيذ
هانبقه نديهم من ان لاخير جرعه فرفشه
حاجه على ما قسم كده
انا نسيت انا كنت عاوز أعيط ليه
نخليها مره تانيه
هوه يعني العييط هايخلص
طول ما احنا عايشين في مصر عمرنا ما هانبطل بكا
ودي تيجي دي حتى متبقاش مصر