الأحد، 25 نوفمبر 2007

رنين الهرمونات



حاولت أن تمزق الطوق:

طوقٌ يحيط بالرغبات

تَربتْ على أن تكبت كل المكنون

ولكن ما يلبث الماء أن يفور،

تفقد السيطرة

تُمسك بالهاتف

وتجري اتصال..

إنه اتصالُ بالحبيب

تسأله عن الحال

وفي داخلها تريد أن تسأله المحال

إنها حبيسة رغبات

تريد أن تخترق المألوف

أن تبوح

بما يراود أي إنسان

بحق طبيعي يراد له أن يكون في طي الكتمان

أو على الأقل أن يكون بنظام

ولكن النظام قيد

والقيد يضيق ولا أمل في انفراج

تمر السنين

والعمر يفوت

والأدوات كادت تصبح غير صالحة للاستخدام

ما العمل ؟ وليس هناك عريس منتظر ..

وليس في الأفق بادرة أمل

والكلُ غير مبال

وكأن العادي أن يبقى البحر بلا أمواج،

أن يبقى الحب حبيس الجدران.

ولكنها ليست بغي

إنها تريد أن تكون مرغوبة،

وبضاعتها مطلوبة.

تحت ستار من الإحترام،

وغلاف يجمل الأمر ويبيح في غفلة من الزمن ما هو عار

إنه الحب

إنه مفتاح اللغز

إنه مبرر لكل فعل مشين

مبرر مقبول ولا يشين

فلنحب

ولنفعل بكل براءة ما نريد باسم الحب

ولنا العذر فنحن نحب..

اي خبل هذا ؟!

أهذا هو الحب ؟

قد يكون بعض الحب..

ولكن إذا أصبح هذا كل الحب

فحيونات الغاب فاقت قيس وليلى عشق

وقطط الشارع تجسد كل يوم أجمل قصة حب

تباً للهرمونات لقد أفسدت علينا حتى الحب

راحت عليك أيها القلب

أنت الأن تدق تدق

و الهرمونات ترن ترن


هناك 26 تعليقًا:

ra7eel يقول...

اول تعليق يالا افتكر الجمايل دى
ده عشان بس انا قرفتك معايا اليوم ايه ده
المهم تناولك للموضوع جميل بجد
الحب مش مبرر فعلا بس هى اوقات ممكن تكون لحظات ضعف
اختيارك لمواضيعك متميز بجد
تحيااااااااااااتى

Mask يقول...

رحيل حمدالله على سلامتك
كلنا بنضعف .. لكن المشكله في اللي بياخد الضعف كقانون ليه بيمشي عليه
واصبح الضعف مش مجرد حدث عارض
ولكنه هدف بيحاول الشخص الوصول ليه
..
ربنا يسترها معانا جميعا

m_y يقول...

ساااامح
اول زياره يبقى موضوع جامد كده
ماشى ياعم
لما اشوف هتعرف انا مين ولا لاء

Mask يقول...

m_y
مرحب بيك
سيبني يومين مع نفسي كده وانا هعرف انت مين

..
خالص الود

Cleo يقول...

أولا ميرسى عالمنديل..

أنا مخاتلفة معاك شوية.. مش الحب هو الحجة لارتكاب العار.. إنما فى كتير من الأحيانات الهرمونات هى اللى بتتظلم فى الموضوع.. يعنى تيجى تعترض أو تفتح بقك أو توجه نصيحة ، تلاقىمتروليوز دفاع من عينة "دى هرمونات.. دى طبيعة جسم.." طب يعنى عندى سؤال.. هو اللى اخترع أدوية بتزود النشاط مش برضه اخترع أدوية تقلله؟؟ أعرف واحد حالف على مراته الكاكاو ماهو داخل البيت ؛-)

Salwa يقول...

أي حد في أي وقت
ممكن يعمل أي شئ غلط
ويجد لنفسه ألف مبرر وسبب
وألف مسمى

المهم
إذا لم تستحي فافعل ما شئت

موضوعك مميز .. بسيط وعميق في نفس الوقت

خالص تحياااااتي

DayDreaming يقول...

معلش يا سامح كان بودي اسيب تعليق ولكني اصبحت في موقف عدائي من هذه الكلمه وكل ما يتعلق بها-الحب- بس انا كل شويه هدخل عشان اخد منديل:)

Mask يقول...

منوره ياكليو
عينة الناس اللي داخله بصدرها في الحياه وجابت من الاخر وبتكلم عن ان الهرمونات هيه السبب دول ناس صريحه..
خلاص بقه الموضوع مش فارق معاهم
وهوه بيعامل نفسه على انه يعيني مريض بالهرمونات
وانه بينقاد ورائها بدون اي ارداه ولا حيله منه.lol
انما الناس اللي بكلم عنهم دول ناس بعد ما كلو الشكلاته بالهنا و الشفا مصريين ان اللي عجبهم فيها غلافها الجميل اللي بيلمع..
يله بالهنا والشفا على دول ودول

Mask يقول...

بالفعل ياسلوى الانسان يعشق المبررات
حتى اذا ارتكب ابشع الجرائم
يعني مثلا بوش قتل 600 الف عراقي
والمبرر انه كان بيمنح العراقيين الديموقراطيه
الللللله مبرر جميل مبرر معقول مقدرش اقول حاجه عنه..
بنت سمحت لولد انه يلمسها
المبرر اصله بيحبني
المفروض نسكت احنا بقه طالما بيحبوا بعض
........
خالص الود

Mask يقول...

اميره منوراني
خدي كمية المناديل اللي تحتاجيها
عندنا فائض استراتيجي
بس انا مش معاكي ان الحب نفسه هوه اللي وحش
احنا اللي بنحب غلط..
ماله يعني لما الناس تحب بعد ما يدخلوا البيوت من ابوابها
ربنا مش هيتوب على المصريين من حب بير السلم و المكروباصات

DayDreaming يقول...

والله يا سامح لابوبها نافعه ولا شبابيكها نافعه اسألني انا يمكن صح ميكونش العيب في الحب بس العيب في الزمن اللي خلى الكلمه دي تختفي

المهم انا مش داخله عشان كده انا داخله اقولك معندكش دكتور كويس عشان التهيؤات اللي بتجيلي
ماااااااااااااااااشي يا سامح

Mask يقول...

يااميره هوه الحب ايه غير شويه تهيؤات ان الواحد هايبقه سعيد مع الشخص دا
وشويه تهيؤات تانيه انه مش عاوز غير الشخص دا
وشويه تهيؤات غيرهم ان من غير الشخص دا ميقدرش يعيش
.......
ولما مبيحصلش نصيب بنجوز غير الشخص دا وبيتضح اننا عرفنا نعيش وناكل ونشرب ننام وكل حاجه
يبقه شوية تهيؤات ولا لأ
....
وبعدين دكتور اللي تروحيله هيه الحياة تحلا من غير تهيؤات

ra7eel يقول...

سامح
لو سمحت امنع المناديل عن اميرة
يمكن لما المناديل تتمنع ربنا يهدى وتعرف ان فى ازمه مناديل
وتبطل
فعلا هى الحياه تحلى من غير تهيؤات
ايه الهبل ده؟ احنا هنعقل امتى ياجدعان
اميره انا عندى دكتور تمام هبقى اقولك
عليه ونروح احنا الاتنين
بس عارف ياسامح انت بجد كلامك صح
قال مين
m_y
ده
؟؟؟؟

Mask يقول...



m_y دا جاري البحث عنه

DayDreaming يقول...

ايه ده يا سامح انت ورحيل انتوا بتككلموا بجد ؟ مش عارف انا بقول تهيؤات على ايه ؟ بتغير الموضوع ده انت باين عليك مصدق ان عندي تهيؤات يعني بتكدب الكدبه وتصدقها لا ورحيل
جايه تقول عندك حق
بعد ما وقعت الدنيا ماااااااااااااااااشي

انتوا عارفين انا قررت اختار الاسم ده عشان المدونه بتاعتي تهيؤات

Mask يقول...

مبدئيا انا بمسوط يااميره انك ظبطي رحيل متلبسه بالكتابه عندي وهيه بتوافقني الرأي المذكور سابقا..
كده هيه متقدرش تنفس التهمه..

ثانيا كل دا كان عشان مصلحتك..
احنا كنا نبدور انا ورحيل على اسم لمدونتك
وعملنا الموضوع دا عشان نوحي ليكي بالاسم
والحمد لله الخطه نجحت
والمدونه شكلها هاتبقه جامده جدا جدا
في انتظار تهيؤاتك يااميره

alaa_salem1 يقول...

السلام عليكم

موضوعك جميل جداً وأحييك بجد على براعة إستخدامك للكلمات ورقي الأسلوب فقي عرض الموضوع.

مع إني أختلف معاك شوية لأني شايفك ظالم الحب أوي .
الحب لا يمكن تجزءته بين العاطفه والجسد
فهما قدماه التان يمشي عليهما وإذا فقد إحداهما أصبح حباً يعاني من مشكلات صحية.
فعلى من يريد الحب أن يقبله كما هو أو فلا يقبله كلياً .
دا رأيي وإختلاف الآراء لا يفسد للود قضية.

klmat يقول...

انا سعيده جدا جدا لمرورك
عندى لأنك اتاحت ليا اشوف مدونتك الجميله
ودى مش مجامله والبوست ده تحفه
وميزته ان الموضوع مهم جدا وباسلوب جميل
انا حسيت بصراع بين الروح والجسد
البنت اللى نفسها تحب وتتحب وتتجوز
وعندها الرغبه فى الجواز وهو مش سهل دلوقتى حقيقى موضوع مهم
مالهوش غير الصبر والتقرب الى الله بالدعاء
وتوسيع دائره المعارف عن طريق حضور ندوات / الجامع / نادى
وربنا يسعد الجميع اهنيك واجييك
على البوست الجامد ده
عميق تحياتى

shreen يقول...

سامح
بوست جميل جدا وخاصة هذا المقطع
إنه الحب

إنه مفتاح اللغز

إنه مبرر لكل فعل مشين

مبرر مقبول ولا يشين

فلنحب

ولنفعل بكل براءة ما نريد باسم الحب

ولنا العذر فنحن نحب..

ولكن لا يمكن ان تقارن هذا بحيوانات الشوارع والقطط

عندما يحدث ذلك بين اثنان متحابين
يطلق عليه
makeing love
اما حيونات الشورارع فقط تلبى نداء الغريزه والهرمونات وفقط
وهو ما يطلق عليهhaveing sex

فشتان ما بين غريزه بحته
وشعور بالحب

Mask يقول...


لكم اسعدني مرورك ياعلاء
وأشكرك على اطرائك
أنا لست اختلف معك في ان الحب عاطفة وجسد
ولا بديل لاحدهما على الاخر
ولكن الامر يتركز في ترتيب الاولويات
فاذا كانت العاطفه تسبق الجسد وهيه الاساس فهذا هو المقبول
اما اذا انعكست الايه فهنا ينقلب الميزان


Mask يقول...


كلمات لا استطيع وصف مدى سعادتي بكلماتك
لقد حاولت قدر استطاعتي القاء الضوء على جانب نفسي في البنت
موجود ولا يستطيع احد تجاهله
ولكن اوضاع كثيره الان اصابت اشكال الحياه بالتلف
وانا متفق معاكي في الحلول المطروحه فالانغلاق التام يزيد المشكله سوء
شكرك على زيارتك الغالية

Mask يقول...



شيرين لست اصدق عيناي
انت هنا تقرأين كلماتي وتردين عليها
ادام الله علي هذه الزياره
وهذه الكلمات الرقيقه
الجزء الخاص بالقطط هو استنكار اذا تحولت العلاقه لجنس فقط
فليس كل العلاقات الانسانيه عاطفه
فهناك جنس لغرض الجنس وهناك جنس لغرض كسب الرزق
وفي الحالتين الاخيرتين ارد ان اقول ان القطط اشرف منا اذا نحن نزلنا
لمستواهم بل هناك من البشر من ينزلق لدون هذا المستوى

بالفعل كما تقولي شتان بين غريزه بحته و شعور بالحب
اؤكد ان هناك ترتيب
شعور بالحب ثم غريزه هذا هو الصحيح
العكس يعطي نتائج مدمره دائما

ra7eel يقول...

سامح فينك مختفى بقالك مده
يارب بخير
على فكرة
تم افتتاح تهيؤات اميرة
ههههههههههههههه

Mask يقول...

شكرا يارحيل على سؤالك..
انا كنت بعافيه شويه..
اخيرا تهيؤات اميره فتحت

د/اجدع بنوته يقول...

تبا للهرمونات فعلا

بس انا سورى واسمحلى اكون مش معاك

الهرمونات بتحرك رغباتنا

لكن الحب مش كله رغبه

الحب الجزء الاكبر منه احاسيس ..

ليس للهرمونات دخل فيها ع الاطلاق

الهرمونات تخليك عايز تتجوز اى بنت وخلاص

لكن الحب يخليك عايز تجوز بنت واحده

اذن القطط وحيوانات الغابه فعلا بتحركها هرموناتها

مش حبها

تحياتى

دمعاتي يقول...

د/اجدع بنوته
انت مختلفه معايا لكن انا متفق معاكي

انت قلتي الحب مش كله رغبه
دا صح لان جزء منه رغبه
وقلتي الحب الجزء الاكبر منه احاسيس
ودا صح لان جزء من الاحاسيس دا جسديه
احيانا بتبقه الفكره فكره ترتيب صحيح واخر غير صحيح
بمعنى ان الصح اننا نحب الروح وبعد كده مش مشكله اننا نحب الجسد لانه هايبقه حق مكتسب
لاكن مش صح اننا نحب الجسد وبعد كده نحب الروح لان غالبا لو طلت الجسد مش هاتهمك الروح

دناوة بني ادمين هاتعملي ايه بقه
تحياتي