الأحد، 11 نوفمبر 2007

اغتيال صرصار




لغاية اللحظه دي الصراصير من الحشرات المغضوب عليها
طبعا اي صرصار بيحسد الأمله اللي فيها الفيران بعد ما اترقت
وبقت تطلع في الفديو كلبيبات وايه نانسي عجرم تدلعها
كل الصراصير في ليله اطلاق هذا الكليب تمنت لو انها ولدت فئراناً..
ومقدرش الوم الصراصير انا اعرف بني ادمين اتمنوا انهم يبقوا فران..
بس المشكله اللي محدش من اللي بيتمنى دول واخد باله منها
انه يوم ما امنيته تتحقق ويتقلب فار مش ضروري يلاقي نفسه في حضن نانسي عجرم ..
طبيعي جدا ان يلاقي نفسه في بلاعه "
او يلاقي قط بقاله خمس ايام مكلش بيجري وراه..
فياجماعه الخير كل واحد يخلي باله بيتمنى ايه.. واللي مش مصدقني يشوف فيلم

Bedazzled

وقبل ما تدوروا على الفيلم وتشوفوه هحكيلكم على حكايه واحد صاحبي مع الصرصار


واحد صاحبي كان بيصلي ركعتين السنه في الجامع ..
وهوه واقف في الركعه الاولى لقا صرصار ماشي جنبه بيتجول.. محطش في دماغه
فجاه وعلى حين غره الصرصار طلع من رجل البنطلون
صاحبي افتكر الصحابي اللي كان بيصلي وهوه بيحمي الرسول عليه الصلاه و السلام و واحد من الكفار عمال يضربه بالسهام و الصحابي مستحمل ومكمل صلاه..
صحبي قرر يكمل صلاه لانه اتكسف من نفسه جدا مقارنه


بالصحابي مع محاوله تنفيض رجله من غير ما حد ياخد باله يمكن الصرصار يخرج تاني ..
المهم عشان ربنا يزود الابتلاء الصرصار شق طريقه متوجها الى اعالي قدم صاحبي


حيث وجد هناك ملاذ امنا ومستقر الى حين..
وهنا انهارت مقاومه صاحبي ونسى كل ما يتعلق بالصبر و السهام و الصحابي الجليل
وخرج من الصلاه وجري على الحمام
خلع البنطون في حركه رشيقه
ونفضه جيدا
نزل الصرصار بيجري
صاحبي قال والله ما انا سايبك يا ابن .........
وجري وراه بالشبشب فأرداه قتيلا
..


ودي كانت نهاية حياة هذا الصرصار
الفتحه على روحه بقه



هناك 10 تعليقات:

هوندا يقول...

ههههههههههههههههههههههههههه
انا حاسه انى كنت بقرأ بوست من البلاعه

Unknown يقول...

انا بطالب بتوفير بلاعات امنه للصراصير
احنا لو وفرنا وسائل الراحه للصراصير في بلاعتها مش هاتضطر انها تسيبها وتيجي تسكن في بيوتنا..

رحــــيـل يقول...

ههههههههههههههههه
يعنى البوست اللى فات اعيط
والبوست ده اضحك
والله ياسامح انت زى العسل
وبعدين فعلا انا معاك فى توفير بلاعات امنه
اصل انا بكرهم جد اجدا جدا
وبقرف منهم قوى

Unknown يقول...

رحيل منوره البلوج يافندم
شوفي حضرتك سياسيه جعل البلوج للبكاء دا
بس منعا للحسد
انت عارفه الناس بقت نفسوها وحشه
لو جه حد ولقانا بنضحك يدينا قرايه ولا حاجه تجيب المدونه الارض

غير معرف يقول...

ههههههههههههه
والله ضحكتني مع اني مش في المود خالص
بس كتر خيره انه استحمل كل ده انا لو مكانه كنت انهارت اول ما شفته جنبي اصلا

بس بوست مفيد يا سامح كفايه اني عرفت يعني ايه صرصار بالانجليزي

Unknown يقول...

احنا هنا مدونه علم وفن هندسه
حبه نكد وحبه مسخره
انا نفسي عمري ما مر عليه كلمة صرصار بالعنجليزي
يعني شويه شويه هانفتحها مدونة تعليم لغات

انا مش فاهم البنات بتخاف من الصراصير بالذات ليه
حاجه غريبه

غير معرف يقول...

على فكرة...ده مكنش فار ده كان هامستر اللي في الكليب...

Unknown يقول...

أهو يعتبر ابن عم الفار ياإزيس

منوره البلوج

د/اجدع بنوته يقول...

ما هو صرصار غلس والله وجابه لنفسه

احسن يستاهل

وربنا يجازى صاحبك خير وثواب ع تحمله الفتره دى كلها بالصبر والعزيمه دى

ههههههههههههههههه

نايس بوست

Unknown يقول...

د/اجدع بنوته

مش بيقولك صرصار وزن على خراب وشه

منوراني