كل حد فينا بيدندن مع نفسه انا من باب التغيير قلت ادندن معاك
بس ياريت يكون صدركم رحب ومحدش يحدف بالطوب
الكلمات بتقول
صعب أحب تاني ياحب خلاص إنساني مليش غير قلب واحد مقدرش أبيعه تاني
كان نفسي اكملهم بس الالهام وقف لغاية هنا
لو حد لقط خط الالهام وجابت معاه قماش
مرحب بقبول الاقتراحات
صعب أحب تاني ياحب خلاص إنساني مليش غير قلب واحد مقدرش أبيعه تاني
كان نفسي اكملهم بس الالهام وقف لغاية هنا
لو حد لقط خط الالهام وجابت معاه قماش
مرحب بقبول الاقتراحات
ولو ضربت نعملها شريط والمكسب ففتي فورتي
واذا حد معجبتوش الكلمات
اتمنى يعجبه الصوت
معجبوش الصوت
اتمنى يعجبه اللحن
معجبوش اللحن
اتمتى يعجبه التصميم اللي في الاول خالص
معجبوش التصميم
ممكن ادفعله ربع جنيه بحيث يعجبه اي حاجه
عشان منظري قدام نفسي بس
/////////////
حمل البوستر بحجم أكبر
واذا حد معجبتوش الكلمات
اتمنى يعجبه الصوت
معجبوش الصوت
اتمنى يعجبه اللحن
معجبوش اللحن
اتمتى يعجبه التصميم اللي في الاول خالص
معجبوش التصميم
ممكن ادفعله ربع جنيه بحيث يعجبه اي حاجه
عشان منظري قدام نفسي بس
/////////////
حمل البوستر بحجم أكبر
هناك 46 تعليقًا:
ايه ده ؟ مين ده؟
كاظم الساهر ده ولا عمرو دياب
شكله كده ايمان البحر درويش
ايه يابني منظمة حقوق الانسان تايهه عنك فين ... يوووووووووه قصدي ستار ميكر يعني:)
ههههههههههه
لا بجد تحفه الصوت رائع واللحن رائع والكلمات رائعه والاداء رائع والتصميم اكتر من رائع
كفايه عليك كده بأه لحد يفتكرني معجبه ولا حاجه
الكلمات جميله يا سامح
والتصميم جميل
الصوت ما اشتغلش عندى
وممكن تكملها
صعب أحب تاني
ياحب خلاص إنساني
مليش غير قلب واحد
مقدرش أبيعه تاني
الحب الاولانى
خان قلبى
ونسانى
خلانى باعلى صوتى
اقول
مش هحب تانى
وكمل انت بقى
تحياتى
ههههههههههههههههههههه
طب و الله جو زى العسل...اموت انا فى الدندنة الجماعى دى
يسلم ايدك الكلمات جميله واللحن ظريف عقبال لما اشوفك فى القنوات الفضائيه بس اوعى ساعتها تنسى المدونه بتعتك وتنسى انى اول مشجعيك
تحياتى
سكون الليل
سامح
يخرب عقلك
مزاجى زفت بقاله 3 ايام بجد
موتنى من الضحك لما جيت عندك
شوف كل البوست تحفه ولا يهمك طبعا قرايب بقى ولازم اجاملك عشان بس منظرك مش اكتر
ههههههههههههههههه
شربات بجد
اميره
اخجلتم تواضعنا
يعني كده كتير هاخد مقلب في نفسيتي
مرسي وكده
shreen
مرسي متحرمش منك
تصدقي تكملتك ماشيه مع المود ياشيرين
انا هابعتلك الصوت على الميل وراكي وراكي
:)
dina
العسل دا بعض ما عندكم يافندم
بس دندنه جماعي فين
هوه بني ادم واحد بس
لكن انا كنت بحاول اعمل صدى صوت ببرنامج
سكون الليل
تسلميلي انت ياسكون
لا متاخفيش انا مش هنساكم
ولما يستضفوني هابقه اذكركم بالخير
بس انا مش احب الشهره والمجد والتالق الخ الخ
فقري بقه
:)
ساره
موتي من الضحك ليه
هوه انا حاطت شريط نكت
على العموم ياستي اهو بنغير عشان الناس متقلش
كله دموع ونكد
وبعدين شربات ايه بس دا من زوقك
مرسي يارحيل
ههههههههههههههه
اول مرة اضحك فى مدونتك ياشيخ
هات بقى الربع جنيه
هههههههههه
لا بجد والله جميل جدا
من كله
لحن وصوت وكله
ممتاز ياسامح
دوحة
المفروض البوست يخليكم تسرحوا في عوالم من الرومانسيه وتعيطوا
ليه بتضحكوا افهم
لو سمحتم مش عاوز اشوف حد بيضحك
امال انا حاطت المناديل عيائه
بس على كل مرسي على زوقك وتشريفك
صعب أحب تاني ياحب خلاص إنساني مليش غير قلب واحد مقدرش أبيعه تاني
هي صعب يكون لها تكمله
أصلها تعتبر حكمه يا مان
بس بجد جميله
والتصميم حلو أوى
الصوت ما وصلش للأسف
عموما
صعب أحب تاني
ياحب خلاص إنساني
مليش غير قلب واحد
مقدرش أبيعه تاني
أبيعه بعد ما جاني
تايه مزبوح يعاني
صعب أبيعه تاني
صعب أضيعه وأنساه وينساني
ومين هيرجعه لو كنت أنا الجاني
قلبي وبخاف عليه وأحميه بكياني
لو حتى أسيت عليه وحبسته بقضباني
لكن أحب تاني .. وأبيعه تاني
أنسى يا حب وانساني
************
معلش بقى أصلى مش أد كده في العاميه
المهم
لو كنت أعرف القصه كنت ترجمتها
ماعلينا
طولت عليك يا سامح معلش
تحيااااااتي
نسيت أقولك
لو عجبتك كمل دندنه بها
كفااااااااااااية... ماتبسطهااااااااش أكتر من كدة
حلوة بجد بس انا عاوزة الربع جنيه ههههههههههههههههههههههههه بس الصوت مش اشتغل بجد انما واضح من الكلمات انها هتبقى حلوة عموما اكتب انت وانا هغنى صوتى حلو بس اكتب اغانى من غير حرف الراء علشان انا لدغه ومتضحكشس عليا بقولك اهو
أنا سمعت يا سامح وانبسطت
شكلك رومانسي جامد أوييييي
لأ وبتألف كمان
إلى الأمام
وصعب يحب تاني
يا حب خلاص إنساه
مالوش غير قلب واحد
مايقدرش يبيعه تاني
كان غيره أشطر يا حب مش كده؟
:)
السلام عليكم
الصوت جميل والكلمات جميله
بس اللحن بطيئ شوية
محاولة جيدة
خالص تحياتي
salwa
تصدقي نظرية ياسلوى
وانا اقول يارب مش عارف اجيب تاني كلام ليه
اتارى مفيش كلام تاني يتقال
مرسي على زوقك
بس هل الصوت مشتغلش فوق ومشتغلش داونلوود كمان ؟؟
وبعدين ياسلوى انت لسه عاوزه تعرفي القصه
مش بيقولوا الكتاب بيبان من عنوانه
cleo
دا اقل واجب ياكليو
نورتيني
صحيح سلميلي على توتا
appy
ايه حكايه الصوت
دا انا حطه مره فوق ومره تحت
جربي الداون لوود
عل كل مرسي على تعاطفك معانا
ومفيش ربع جنيه
بالنسبه للغنا
ممكن نعمل دويتو
وانا هاشيل المقاطع اللي بالراء
جينا في جمل يعني
او انا اغني وانت تقولي
تيرارررررررررررررا راااااااااااااااا
اختاري اللي يعجبك
maii bahaa
الحمد لله انك ابتسطي
هاتي اني ربع جنيه بقه
اه والله ياختي انا بشر رومانسيه بس البخت بقه
مرسي على مرورك
علاء سالم
وعليكم السلام
مرسي ياعلاء على كلامك
هيه ليها لحن سريع بس انا كنت بتسلطن على نفسي
:)
الحمد لله الصوت اشتغل
عملت داونلود
بس إنت مش قلت رأيك في التكمله بتاعتي
هي وحشه أوى كده ؟
تحياااااااااتي
مش لما تقولي رايك في الصوت
بس يله هاقدم انا السبت
هيه حلوه ومكمله للمعنى
بس بحاول ادندنها على نفس اللحن مش عارف
:(
اول زيارة للمدونة مكنتش اعرف ان الموضوع كدا
المرة الجاية هاجيب مناديلي معايا
البداية موفقة بس نصيحة لو عايز تكملها ما تفكرش انك تكملها وهتلاقي الالهام جه لوحده
جو المدونة رغم انه حزين بس حلو
مممممممممممممممم
الصوت واللحن كويس
أهو أنا بقدم السبت برده أحسن مايكونش معاك ربع جنيه فكه
تحيااااااااتي
الصوت اشتغل حلو قوى عندى
و اليكم التعليق
كويس قوى قوى انك لك قلب واحد
و اقترح عليك بلاش تحب تانى ابوس ايدك
ههههههههههه
ملحوظة صغيرة يا ريت محدش ياخد باله منها
الصوت معقول جدا بس غير الاغنية
:)))
تحياتى
و بعدين هو حب دة و لا مصارعة حرة
جميل اوي يا سامح بجد الصوت وحتى الكلمات اللي فعلا عايزه تكمل عشان تزيد...
انا سمعتها وبعدين شغلتها تاني ... لاني حسيت فيها بروح ...
دي موهبة جديدة مكنتش اعرف ان تملكها ...
ربنا يوفقك...
دمت بكل ود...
خالص تحياتي
سنووايت
مرسي على الزيارة الغالية
اتمني ان لا تكون الاخيرة
سلوى
ايوه كده خليكي دبلوماسية
رانيا
شكرا على التعليق الوافي
بس انا شكلي مش هاستحمل كتير و هارجع احب تاني
سنة الحياة بقه
أسامة
ربنا يكرمك يااسامه
حقيقي رأيك اعتز بيه
ان شاء الله تكمل باوان
خالص الود
الحقيقة
جميلة بجد استمعت اليها كتير حلو اللحن والصوت فيه احساس عالي قوي
انا بدأت فعلا اكمل أبيات لها لعلها تلقى إعجابك
تحياتي
انا اول مره ادخل المدونه
واما جيت اعلق لاقيتك كاتب وهات منديلك ما تصورش ضحكتنى اوى
اما الاغنيه ميه ميه
الصوت عال العال
والكلمات قطعتنى دموع ذى الحنفيه اللى اتفتحت ومش عارف تكتمها ازاى
وانت بصراحه بكلماتك الصادقه اوى دى جيت ع الجرح اللى بحاول اداويه
مشكور ع ابداعك
وان شاء الله اتابع ف مدونتك وجديدك ويكون معايه دسته مناديل لانى ماكونتش عامله حسابى انى هتاثر للدرجاتى
حسن ارابيسك
شكرا ياابو علي على زوقك
انا مبسوط انها عجبتك
وانا متاكد ان اللي هاتكتبه هيكون جميل ان شاء الله
bob
مهو المناديل يا بوب مش بس عشان العياط مش يمكن بعد الشر حد عنده برد ولا حاجه
بس متتلككيش فيه
انت تلاقيكي اصلا عاوزه تعيطي ومصدقتي
انا شكلي بجد جيت على الجرح
بس انت برضه حنفيات دموعك مكنتش محتاجه واسطه
على العموم
انت طبعا واكيد ولا بد انك نورتيني
واتمنى انها متكنش اخر زياره
الكلمات جامدة بجد
وأدينى هحمل واشوف
اكتب تعليقين ورا بعض واخد منديلين ؟؟
اولا هى بدايه الاغنيه جميله جدا جدا
وحاول تكمل الكلمات زى ما بدءت بالمقدمه
عموما
انا هبداء بالتحميل
ولو ان معظم التعليقات بتقول ان الصوت مش شغال
انا هاجرب
اولا حمد الله على السلامة
-------------
مليش غير قلب واحد مقدرش أبيعه تاني
الوحى جابلك الى فيه المفيد و اختصر ما وقفش معاك و لا حاجة ايه بعد الجملتين دول يتقال تانى ؟
الدندنة مش عايزة تفتح معايا خالص
مرسي يامروه
يارب تعجبك
ولو انك شكلك حملتي وجريتي
Lol
فرنسا هانم بنت عمي هنا بنفسها
والنبي دا عيد
الصوت اللي فوق لو مش شغال عملت الصوت تحت بيتحمل
عشان الاعطال الفنية
عاليا
الله يسلمك
اخبارك ايه
لو رأيك كده انا موافق يمكن فعلا الوحي جاب المختصر
حملي الاغنيه من الرابط اللي تحت لو مشتغلتش من فوق
صوتك جميل فعلا بدون مجاملة
وانا ارشح كلمات سلوى لاستكمال الدندنة
برافو عليك
ماشاء الله يا عم المتواضع
ساكت على نفسك ازاااااااااااااااااااي
انت تحفه بجد
عارف لو كنت في المجال ده ولو ليا اتصالات بحد مكنتش هسيبك ابدا
الجمله روعه
الكلام حلو واللحن حلو والصوت حلو
يعنى من الاخر كلك على بعضك حلو
مع إنه للوهلة الأولى
حسيت إن مووود المدونة حزين
لكن البوست كان غير كده خالص
طبعا أنا لسه مسمعتش لإنه بيحمل
لكن فى كل الأحوال
أنا عايزة الربع جنيه
راجي
ربنا يكرمك دا من زوقك
انا سعيد اني نلك اعجابك
كلمات سلوى فعلا جميله.. شويه امخمخ وبعدين نشتغل
-----------
زمرده
انا مش ساكت.. بس محدش راضي يكتشفني
تحفه اللي هيه حاجه حلوه ولا شتيمه
طب همشيها حاجه حلوه لزوم سلامة نيبة بداية التعارف
يعني هما اللي في المجال هيمسكوا فيه. دا من زوقك بس
انا اصلا متخيليش نفسي بغني وكلام من دا
انا بغني مع نفسي تفاريح
---------------
على اسم مصر
والله انت اللي كلامك زي العسل
كل دا عشاني
دا كتير والله
مرسي بجد على مرورك وكلامك في حقي
------------
فزلوكه
بدانا شغل الفزلكه من اولها
الارباع خلصت
مالوجيتي بدري كنت لحقتي ربع من بتوع زمان
على العموم انا خلاص بقه ليه معجبين وبقيت مغرور
فمجرد ما تحملي الاغنيه وتسمعيها انت اللي هتدفعيلي ربع جنيه
ايه دا انا اتعديت من فزلكتك
Lol
مرسي لمرورك الجميل
ونشوفك في الافراح ان شاء الله
****توضيح *****
تحفه = جمييييييييييل جدا
لدرجه انها تتحط في المتحف علشان محدش يستحوز ع الجمال لوحده
وصوتك كده
** توضيح تاني **
دي مش اول مره نتعارف اول ازورك
بس الفتره اللي فاتت كانت صعبه
والله اعلم باللي جايه
**********
اشكرك من قلبي ع التواصل
ووفر المناديل لمره تانيه
او لدور برد
هههههه
انا عارف طبعا انك تقصدي المعنى الحلو
بس كنت بهزر معاكي
بس والله احرجتيني بزوقك
ربنا ما يحرمني من طلتك
اتمنى ان الفتره اللي جايه تمر عليكي بخير وسلام
وتحققي فيها اللي تتمنيه
عشان انت قلقتيني عليكي
وربنا ما يجيب برد
ايه يا سامح انت فرحان بصوتك ولا ايه متغيرلنا البوست ده بأه :)احسن كمان شويه مش هنعرف نكلمك
اديته حنانى اديته وفى قلبى خبيته
خدمنى عمرى وقلبى وللغدر بأديه باعنى
يازمان انساه وانسانى ده البعيد غدار وانانى
يمكن اكون نشزت شويه
بس بجد كلمات جميله وتصميم اكثر من رائع
تمنياتى لك بالتوفيق الدائم
مع خالص تحياتى
اميره
والله مش عارف من غيرك اعمل ايه
دايما بتفكريني بمعاد البوست الجديد
ابقي خدي منديل زياده وانت خارجه
وبعدين اني متعرفوش تكلموني دي دا كلام برضه
هابقه اخليكم تكلموا مدير اعمالي
رهف
سعيد جدا بمرورك
ومدخلتك
تكلمتك جميله محتاجه شويه موسيقى وهيه تبقه فله
شكرا ليكي
الكلام لغاية دلوقتى حلو اوى وبسيط جدا وقريب من حاجات ومواقف كتير مننا مر بيها والصوت كمان حلو على فكرة من غير غش
بص لو ده ينفع:
صعب أحب تاني
ياحب خلاص إنساني
مليش غير قلب واحد
مقدرش أبيعه تاني
ناديته بأعلى صوت
ملقتش غير سكوت
ضميته بين احضانى
وزرع فى قلبي شوك
قاسي فى عز ضعفى
وبيحفر جوا جرحى
لآمتى هقدر اتحمل
قلب عمره ما حب
وارجع واعيد سؤالى
هو يستاهل الحب
ولا كفايا على قلبى منه
هقدر استغنى عنه؟
ولا كفاياك ياقلبى
كفاياك هموم وجرح
انت فين بقالك كتير مش فى الساحه ليه
tayer_ya_hawa
شكرا على مشاركتك
الجزء دا عجبني جدا
"
ناديته بأعلى صوت
ملقتش غير سكوت
ضميته بين احضانى
وزرع فى قلبي شوك
"
ماشي تمام مع اللحن
تحياتي
----------------------
appy
عندي حالة احباط ياأبي
ربنا يعديها على خير
مرسي على سؤلك
بجد الكلمات عجبتك ده من ذوقك ورقتك انت يارب يكون وش الكلمات عليك حلو وتعمل احلى اغنية ويا ارق لحن
ربنا يوفقك ان شاء الله وشرف ليا ان كلمة واحدة حتى تعجبك مش كذا كلمة كمان
اتمنى لك التوفيق بجد يارب
ربنا يكرمك يايسمين
متحرمش بجد من كلامك الرقيق
دا تقدير اتمنى من ربنا اني بجد اكون استحقه
ميرسي بجد يا سامح على زيارتك للبلوج بتاعى انت نورتنى.
وطبعا اى حاجة بكتبها مش هتيجي نقطة فى بحر اسلوبك الرقيق وشرف كبير انك تقرا اى حاجة ليا.
وبعدين الكلام اللى بقوله ده مش مجرد كلام لان فعلا اسلوبك فى الكتابة بسيط وله معنى وتحس فيه بالصدق والروح بجد، وصوتك كمان والله حلو
فى الغنا .
واى تعليق بكتبه انت اكبر واعز منه بكتير على ادق ذوقك واخلاقك.
ربنا يوفقك ان شاء الله يا سامح
حقيقي نعمه كبيره من ربنا
ان الاقي تقدير منك بالشكل دا
شكرا يايسمين
متحرمش منك بجد
وربنا يكرمك
إرسال تعليق