الأربعاء، 9 يناير 2008

صراخ المصريين


المستشفيات الحكومية في 2008

الحمد لله فيه جديد وفيه تطور ودا المهم
المهم ان يكون فيه حركه لان الحركه بركه
في 2008 في المستشفيات الحكوميه دخول طوارئ على ايدك اليمين
المريض بيجيب من بره الترمومتر بتاعه
وخافض الحراره
ومسكن الالم
و طبعا العلاج الاساسي من القاهره
و الاشعات المطلوبه بتورح تعملها جوه المستشفى كتر خيرهم

بس كله يهون قصاد ان الدكاتره ماشاء الله فاهمين ومتعلمين كويس
وعارفين شغلهم تمام وان العنايه جيده والتحسن مستمر


اللي بالازرق دا مجرد احلام

واتوجه بالشكر للمسؤلين وانت طالع
لحد ما تخبط في المسؤل الكبير
اللي مهنينا في الشارع وجوه المستشفيات وفي المحافل الدوليه

ومتقلش ايه ادتنا مصر لان مهما مصر ادتنا هانفضل عالم جاحده مش بيطمر فينا الخير

يارب انت عارف ان الحل ياصندوق انتخابي نضيف
ياصندوق ديناميت
طب اللي مش طايل دا ولا دا
مفيش قدامنا غير صندوق الدعاء ليك
يارب بحق انك عدل ورحيم متكتبش علينا 25 سنه زي دول تانين

هناك 20 تعليقًا:

Lobna Ahmed Nour يقول...

من شدة السعادة ممكن اطلب علبتين

مناديل لو سمحت

على فكرة المشكلة مش في ال25 اللي

فاتوا ولا في 25 الجايين

المشكلة ان احنا محتاجين معجزة

ويمكن تكون موجودة

في الثلاث صناديق بتوعك

تحياتي..

Unknown يقول...

unique

ممكن علبه .. اتنين موعدكيش

ملحوظه
الصندوق التاني كان زلة لسان
انا مش ناقص مشاكل
وانت عارفه ان مفيش ورا الشمس مناديل


تحياتي

DayDreaming يقول...

شكلنا احنا اللي هنبعاتلك مناديل الفتره الجايه يا سامح ده لو عرفنا مكانك اصلا ;)

كل اللي اقدر اقولهولك اني دخلت مستشفى مره اسبوع مرافقه لمريضه خرجت منها انا اللي مريضه صحيا ونفسيا

وعلى رأي معرفش مين متقولش ايه ادتنا مصر قول هناخد ايه من مصر

Unknown يقول...

اميره ياريت فعلا كل زائر بيدخل ميجيش واديه فاضيه
تبرع ولو بمنديل
الحقيقي انا فعلا نفسيتي في الحضيض بسبب الموضوع دا
هقول ايه بس
ربنا يخفف عن كل المرضى
ويفك كربهم

رحــــيـل يقول...

انا اساسا بكره المستشفيات جدا

وليا بقى مع طوارئ المنصوره حكايات ليها العجب عمرى ماانساها
اصل ايام المدينه الجامعيه
كان فيه عريبه اسعاف خاصه بطالبات المدينه
وانا كنت موجبه مع اصحابى مسبش واحده تروح لوحدها ابدا
مش عايزه اقولك بقى على الخدمات اللى هناك و لا النضافه ولا قلب الدكاتره الرهيف
ولا الممرضات السكر
ولا المرضى اللى ليها اماكن كتير والعنايه والرعايه الرائعه

ولا كله كوم ولما كنت بعمل شاى مره واتزحلقت راحت الميه المغليه جت على وشى فى المدينه
والاسعاف جه بعد الهنا بسنه
وهناك بقى كانوا بيبعتونا من غرفه لغرفه وسايبنى اولع
ولما حد عبرنى تعاملوا معايا بمنتهى الرفق فعلا

ياااااااااااه فعلا احنا عالم جاحده
ضرور يعنى تفكرنى بالذى مضى ياسامح

سلااااام

Unknown يقول...

نعمل ايه بس الحجود اللي احنا فيه يارحيل
يعني البلد واخدنا على كفوف الراحه واحنا مش بيطمر فينا
يله ربنا يهدينا

walaa يقول...

لا انت عايز تعرف قد ايه مصر مليانه فساد تروح مستشفى عامه الناس مبقاش عندها ضمير الدكتور من دول لما يكبر بيقول يلا نفسى وازاى اجيب عربيه ولا شقه وخدنها تجاره صدقنى مش رساله
بس ايه حكاية المناديل دى هى متوفره

عندك كده شكلك عامل ااحتكار للمناديل انا هبلغ عنك
تحياتى لك ولاء

سلوى يقول...

إيه مستشفى الأحلام دي

على فكرة لو الأمر ده إتحقق

مش هنحتاج بعد كده لمناديل

بس الأمل حلو برضه

خد بالك من نفسك يا سامح الفترة الجايه

تحيااااااااتي

دكتور حر يقول...

قصدك ايه ان الأزرق حلم يا اخويا

(:

ماشي

لكن في صندوقين تانين أضيفهم لصندوقك

صندوق في صدرنا وصندوق في جمجمتنا

يشغلونما شويه
لو منفعوش نروح عالصندوقين التانيين

ربنا يلطف بينا يا رب

لك تحياتي

مروة الزارع يقول...

بوست رائع جداااا

انا ليا تجربة سابقة مع المستشفيات

خش عندى أقرأ بوست بتاع

ولاعدش رحمة .. مولد وصاحبة غايب

وأنت هتعرف قصدى أية

أرحمنا يارب

Unknown يقول...

walaa
الكلام اللي مكتوب دا عن مستشفى عامه بالفعل
مهو مفيش في مصر الوقتي حاجه مجانيه
وحتى لما بتدفع فلوس مش بتلاقي عنايه
بلاش تبلغي عني ونقسم بالنص
تحياتي



salwa
يعني ايه اخد بالي من نفسي
خضتيني ياسلوي وانا مش ناقص
تقصدي هاعيا يعني ولا هيقبضوا عليه
ربنا يستر


دكتور حر

يادكتور انا بحبك اه
لكن بكره الدكاتره عما
ودا كونفلكت نفسي بعاني منه
فاستحملني بقه
وياريت تجدعن وتتخرج عشان نبقه نيجي نكشف عندك ببلاش
ولا ساعتها هاتعمل متعرفنيش

مروة الزراع

تحياتي لك يامروه
وهشوف البوست ان شاء الله

ابن حـجـر الـعـسـقـلانـى يقول...

يا إما صندوق انتخابات يا إما صندوق ديناميت

بصراحة الجملة اللى فاتت دى ممكن تخلينا ندمع عليك من هنا لسنة قدام .. بس أهم حاجة إنك تكون سايب لنا مناديل كتير تكفى الله يخليك

Unknown يقول...

ابن حجر
لوم ما اروح العمبوكه
هاسيب ليكي بوست هنا تعيطوا عليه فيه
وهوفر ليكم مناديل بكميه مناسبه
واتبرع ولو بدمعتين

د/اجدع بنوته يقول...

مش متعاطفه معاك المرادى بقى بتاتا

اولا الدكااتره وربنا ماعجبهم الحال ف المستشفياتا خالص

واحنا اول ناس بنطالب بامكانيات وبغيره

بس لما تبقى دماغ سيادتك مفتوحه وتيجى اخيطهالك م غير بنج

هتطلع تشتم ف اللى خلفونى والدكتوره اللى معندهاش قلب ولا رحمه

لكن متعرفش ان مش بايدى حاجه لان اصلا مفيش الامكانيات دى
احنا بنعمل اللى علينا ف ضوء الامكانيات المتاحه

وربنا يسهل يارب والبلد تغتنىىى
ويبقى مستشفى لكل مواطن

تحياتى

Unknown يقول...

دأجدع بنوته
اولا مرحب بيكي
ثانيا بعد الشر عليه من ان دماغي تتفتح
لان لو اتفتحت حتى لو انت خيطهيا ودا شرف ليه طبعا دا مش هايغير من واقع اني هموت ..
ثانيا انا بفرق جدا جدا بين
ضعف امكانيات المستشفى ودا مرجعه للدوله مش للدكتور
وبين ضعف امكانيات الدكتور ودا راجع للدكتور مش راجع للدوله

الدكتور مينفعش يتعامل مع المريض بمنطق الميكانيكي
بالظبط هوه بيصلح عربيه جماد ومش من حق العربيه انها تفهم هيه عطلانه ليه
او حتى تسال
ولو تجرات العربيه السافله وسالت
يبقه يتبص ليها بقرف او يتم تطنيشها
وعادي ينفض ليها ويكلم مع زميله بالانجليزي
ولما يكتشف انك فهمت اللي قاله وبتساله بناء على اللي قاله يقوم ياسألك
انت دكتور ؟
وكان بس لو زميل ليه عيان هوه اللي من حقه يفهم
للاسف الامثله دي بتكون سيئه للغايه
ودا راجع لشخصيه الدكتور مفيش لامكاينات الدوله علاقه بان الدكتور يكون انسان
و طبعا دا مش الكل عشان التعميم خطأ لا يجب ان نقع فيه
بس على الاقل 90 % من الدكاتره اللي شفتهم في حياتي كانوا كده
وصدقيني ال 90 % دول كتير

خدي ورده لانك اكيد زهقتي من المناديل

مدحت محمد يقول...

يارب ااااااااااااااااااااااااااااااااااااميييييييييييييييييييييييييين
متخافش يابنى من تعليقات الناس دى
قال ورا الشمس قال هشهد معاك انهم اللى حرضوك على كتابتها
بس خلى بالك من نفسك اليومين دول زى ماسلوى بتقلك
على العموم بجد حال المستشفيات
اقلك موقف بسيط والدى الله يرحمه لما تعب
وجبناله الاسعاف
وودانا لمستشفى
كان مفيهاش قسم حالات حرجة
فقلناله اطلع على مستشفى تانية
قال انا معنديش تعليمات بكدة
لولا طبعا فى واسطة
وزعق فيه
الصراحة الاهمال
فى المستشفيات مبينتهيش
ربنا يبعدنا ويبعدك عنها
وكل السامعين
قصدى اللى متابعين
وجميع المسلمين
على فكرة انا بالنسبة لموضوع فلسطين
انا بتفق معاك جدا
بس
برضه
يجب اخراج الاسرائيليين من كافة الاراضى المحتلة
لانى بعتبرها سرطان خبيث
وبينتشر باعجوبة
خالص تحياتى

Unknown يقول...

doha
اشكرك على تضامنك
ومنشفكيش في شهادات خالص ياشابه
ربنا يسترها معانا
ونكمل بقيت المده على الارض بسلام
انا متفق معاكي يجب اخراج المعتدين
بس مش هيخرجوا قبل ما نخرج المعتدين اللي بالك فيهم
واخده بالك معايا
يله سلام اجهز العيش و الحلاوه

خلود صلاح يقول...

ااه يا سامح
ونسيت انت تقول على المسئولية بتاعت الدكاترة والرجولة والشهامة الى بتخليهم ميقبلوش حالات كتير الا بعد حاجة من

1- ياإما لايتم انقاذ المريض الا بعد دفع المصاريف واللذى منه

2- يا اما لا يتم انقاذ المريض اصلا عشان فاقدين فيه الامل ويقولك لا شيل انت مسئوليته

3- يا اما مفيش دكاترة اصلا عشان تستقبل مريض واخبط راسك فى الحيط " مع الاعتذار"

متكلمتش انت اصلا عن واحد يدخل سليم ويخرج عيان

لالا بلاوى على فكرة
خاصة اذا كنا بنتكلم على المستشفيات الحكومية

بس اقولك سر؟؟
لا حكومى ولا خاص يا مسيو

كدة عليك علبة مناديل عشان انت فكرتنى بحاجات وحشة

مدحت محمد يقول...

جهزت العيش والحلاوة ولا لسة يابنى
هههههههههه
دوحة

Unknown يقول...

ياخلود
خير ربنا كتير
والمناديل مفيش اكتر منها
بس السؤال هل لسه فاضل دموع نبكيها على حالنا ؟


دوحه
العيش الناس بتحارب عشان تجيبه من الفرن
اشتريلي باتنين جنيه عيش
وانا هفوت اخدهم منك
بالنسبه للحلاوه هاقضيها جبنه وخلاص