السبت، 29 ديسمبر 2007

تاج رحيل



أول مره أرد على تاج
بس نعمل ايه بقه
حكم القوي
مقدرش ارفضلك تاج يارحيل
استعنا على الشقى بالله

لو مكنتش مصرى بس عربى كانت هتبقى ايه نظرتك للمصرين واللى بيحصل فى مصر دلوقتى؟

اعتقد اني هكون من الفئه العربيه اللي مازالت بتحترم المصريين
واللي المصريين في نظرها هما المصريين الجدعان
اللي ساعدوا وعلموا و مبخلوش لا بمال و لا بدم..
واللي بيحصل في مصر ازمه زي اللي بتمر بيها دول عربيه اخرى مسيرها تنقشع
ــــــــــــــــــــــــــــــــــــــــــــــــــــــــــــــــــــــــــــــــــــ
لو كنت اوربى او غير مسلم هتبقى ايه نظرتك للعرب والمسلمين؟
باعتبار ان الميديا عماله غسيل مخ معتبر
واحنا الميديا بتاعتنا معملتش اي رد فعل يفيد
فاهتكون نظرتي للاسف
انهم مجموعه رعاع متخلفين
ارهابيين همجيين
متعطشيين للدماء
و مجرد مستهلكين للعلم وليسوا منتجين له
ــــــــــــــــــــــــــــــــــــــــــــــــــــــــــــــــــــــــــــــــــــ

قالوا لك انك بقيت رئيس جمهورية هتعمل ايه؟
وضع دستور جديد مبني على الواقع ويحترم الحقوق و الحريات واهمها
حرية انشاء الاحزاب
و الصحف
و انشاء نظام تعليمي حقيقي في مصر يتبناه احمد زويل
البدء في مشروع ممر التعمير الخاص بفاروق الباز
تنفيذ مطالب نادي القضاه
والبدء في استرداد املاك المصريين وتفعيل قانون
" من أين لك هذا ؟ "

ــــــــــــــــــــــــــــــــــــــــــــــــــــــــــــــــــــــــــــــــــــ
لو سمح لك برؤية الرسول صلى وانك هتقول كلمه واحده؟
هقوله احنا محتاجينك جدا
ــــــــــــــــــــــــــــــــــــــــــــــــــــــــــــــــــــــــــــــــــــــ
لو كنا فى عصر اذدهار الاندلس كنت تتخيل نفسك ازاى؟
مسؤل عن مكتبه من مكاتب المدينه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لو خطبت واحده او اتخطبتى لواحد واثناء الخطبة اكتشفت او اكتشفتى ان الطرف الاخر غير قادر على الانجاب هيكون ايه تصرفك؟
هاكمل معاها لكن هاستاذنها اني اتزوج تاني
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لو طلعت على القمر هتكتب ايه؟
أرض فضاء ملك سامح
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لو مررت التاج لحد وماجاوبش هتعمل ايه؟
هاعيط
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تمرر التاج لمين؟
مش همرره عشان مليش نفس اعيط

هناك 21 تعليقًا:

دكتور حر يقول...

اجابات مختصره وفي الجول
يا عم سامح
الله ينور

بس حلو موضوه مسؤول مكتبه ده

اشمعنى صحيح؟؟
(:

سلوى يقول...

جميله الإجابات وخفيفه

سؤال رئيس الجمهوريه
إجابته حلوة

ولا لما طلعت القمر بقى

ملك سامج

ربنا يوفقك أخي
تحياااااااااتي

DayDreaming يقول...

حمد الله ع السلامه اولا
طبعا جيت لئيت نفسك مدبس في تاج رحيل
اجاباتك كلها لذيذه ومختصره
عجبتني اوي اجابة سؤال القمر اللي هتكتبه بأسم سيادتك ده

بس عايزه اعرف ليه كل الرجاله جاوبوا على سؤال شريك الحياه ده بنفس الاجابه مع ان معروف طبعا ان غريزة الامومه اقوى ومع ذلك كل البنات جاوبوا بالمعنى ان ممكن يستغنوا عن امومتهم لو مع شخص بيحبوه ؟؟؟؟؟؟؟

no chance يقول...

السلام عليكم
تمام يا سامح
انت جبت من الاخر
بس سورى يعنى
اى العفانة دى
لو ارتبط بواحدة وعرفت انها مش قادرة على الانجاب هتتجوز عليها.؟
دانت وفى اوى على فكرة
على فكرة اى بنت لو اتسالت السؤال دة بتقول عادى ومش هغير فى تعاملى معاه لانى بحبه هو بس
لكن واضح ان الرجالة اوفياء اوى عن البنات
كل سنة وانت طيب
خااااااااااااااااااالص تحياتى

Unknown يقول...

دكتور حر
منور
الاندلس كانت بتشتهر بالمكتبات جدا
يعني تقدر تقول كان عندهم مشروع القراءه للجميع بجد
وبما ان مينفعش اكون محارب ولا فارس
فدي المهنه اللي شايف نفسي فيها

Unknown يقول...

salwa
فيه شركه كانت بدات في بيع اراضي على القمر
وفعلا فيه ناس كتير اشتروا..
الرغبه في الامتلاك قويه جدا عند الانسان حتى لة هايمتلك مجهول
لا شيفه ولا يملك سلطه عليه..
فجت عليه انا ياسلوى !!
طب خلاص بلاش القمر كله
هاخد عشر فدادين وجبل

Unknown يقول...





daydreaming
الله يسلمك منتحرمش من زوقك ابدا.
يادي القمر اللي تاعب الناس
ياستي لما القمر يبقه بتاعي هاسبكم برضه تتفرجوا عليه و ببلاش
يله زكاة عن صحتي.. اظن كده عداني العيب :)

بالنسبه لموضوع البنات هايستغنواعن الامومه دا خلينا واقعيين..
فيه لحظة ما سكنة الحب بتكون سارقه الواحد مش بس هيقول
انه هايستغنى عن الامومه .. لا الامومه و الاكل و الشرب و حياته نفسها..
مفيش لا ابسط ولا اسهل من ان الواحد يدعي المثاليه ويقول انه هايضحى في سبيل الحب ويستغنى.. بس دا كلام مسلسلات..
لما اكونمن الوقتي اهلي نفسهم ارتبط و اتجوز عشان يشوفوا اولادي
وانا بكل بساطه احرمهم واحرم نفسي من نعمه زي دي عشان الحب!!
لا انا في الحاله دي حبي لاسرتي ورغبتي اني اسعدها بااولادي هيكون اكبر من
الحب العاطفي اللي كلنا عارفين انه بيروح ويجي زي نزلات البرد..
اخيرا
انا لو مكانها هاحلها من الارتباط بيه.. فاللي ارضاه لنفسي ارضاه لغيري.
وانا مقلتش اني منتظر انها تحلني من الارتباط بيها انا قلت هكمل معاها.. وهاستاذنها في الارتباط يعني مش هاروح اتجوز من وراها.. هانتظر انها تكون راضيه ولوهيه بتحبني هاتوافق لان دا حل وسط
هانعيش مع بعض وفي نفس الوقت الحياه هاتستمر..

Unknown يقول...

no chance

وعليكم السلام
يااحمد مع تحفظي على ردك
لانه غير لائق بالمره
وانا مش شايف ان فيه داعي تستخدم الفاظ مش مناسبه...
انت راجل مدون وتعرف اكيد ازاي ترد على اللي بيختلف معاك.. ولا ايه؟

الغريب ان ردك كان ممكن يبقه منطقي لو مثلا انا قلت
اني هاسيبها...

لكن انا قلت اني هاكمل معاها و هاستاذنها.
يعني هيدور بينا نقاش عقلاني عن الموضوع نوصل فيه لحل ميدمرش
حياتنا بعدين..
لكن ادعاء المثاليه مبقاش يأكل عيش اليومين دول
تحياتي
وكل سنه وانت طيب

زُمُرده يقول...

اجابات جامده
خصوصا لما تطلع القمر و تبقى رئيس جمهوريه
واشمعنى هتبقى مسؤل عن مكتبه في عصر الاندلس؟؟
عجبني وضوحك في موضوع الانجاب

Unknown يقول...

زمردة
شكرا على زوقك
موضوع المكتبه سالني فيه دكتور حر وجاوبت عليه ان دي الشغله اللي شايف نفسي فيها بما ان البديل اني اكون محارب او فارس

موضوع الانجاب انا جاوبت بعقلانيه
بماان التاج مكنش بيدور حول مسابقه افضل اجابه مثاليه

no chance يقول...

السلام عليكم
ازيك يا عم سامح
والله انا اسف جدا بجد
مكنتش اعرف بجد انك ممكن تزعل
معلش بكرر اسفى
وانا مقدرش على زعلك يا باشا
سامحنى بقى يا حاج وخللى قلبك كبير



im tooooooooooooo bad

so im tooooooooo sorry

زُمُرده يقول...

هابى نيو يير ... وحاجات حلوة وطراطير .... وجاتوه وفطير....والأهلي خطير ..... والريس لسه قدامه كتير

Unknown يقول...

حصل خير يااحمد
وكل سنه وانت طيب


زمرده لازم تفكرينا يعني ان لسه قدامه كتير
على العموم كل سنه وانت طيبه

رحــــيـل يقول...

سامح
كويس انك لحق نفسك وجاوبت على التاج انت رديت متاخر
بس يالا هعديها
اجابات لذيذه
اما بقى بالنسبه للقمر
انا شايفه انك تعمل تذاكر ونبقى نطلع رحلات
مسكنى انا االموضوع ده وانا اخربهالك

حمد الله على السلامه

Unknown يقول...

ازيك يارحيل
انا موافق على مشروع القمر دا
اهو حاجه نسترزق منها وناكل منها عيش
انا اتااخرت عشان مكنش فيه نت
يعني عندي حجه غياب زي ما بيقولوا

klmat يقول...

اجابات جميله
ياريتك كنت رئيس الجمهوريه
القرارات اللى قلتها كفيله بالأصلاح
رأيك فى المصريين جميل وانا معاك فى رأيك
اجابتك كلها جميله
ربنا يوفقك
سلااااام

Unknown يقول...

klmat
يسمع من بقك ربنا ياكلمات يااختي
وان شاء الله مش هنساكي في التشكيل الوزاري
هاعينك مسؤلة وزارة المدونات
خالص الود

خلود صلاح يقول...

ههههههههههههههه


مالكش نفس تعيط


احسن العياط دة مزاج يعنى مش اى وقت كدة تعرف تنكد على نفسك
دة عايز طقوس معينة

إسألنى انا
هههههههههههههههه


اجابات جميلة
:)

Unknown يقول...

خلود صلاح

خلاص ياستي
اعتبري نفسك من اللحظه دي
المستشاره المعيتطيه بتاعة المدونه
وهانعينك كمان رئيسه مخازن علبة مناديل المدونه
الحمل تقيل و المسؤليه كبيره وانت قدها
بما انك خبيره في العيط وطقوس العييط

خالص تحياتي

د/اجدع بنوته يقول...

لو طلعت على القمر هتكتب ايه؟
أرض فضاء ملك سامح

هههههههههههههههههههههههههه
تصدق جامده ..

اجابات منطقيه ومعقوله وفعلا خلتنى اقول انا لو بجاوب

مش هزود كلمه عن كلامه ده

ال ارض فضاء ملك سامح ال

ههههههههههههههههههههههههههههههه

Unknown يقول...

د اجدع بنوته


شفتي بقه مش كله هنا عييط
فيه ضحك برضه
بس اللي يدخل يضحك بيدفع غرامه علبة مناديل
سبيها على الباب وانت بتعملي ساين اوت
:)

تشتري فدانين جنب جبل متميز على القمر السعر مغري