الأربعاء، 12 ديسمبر 2007

قضينا تلت المده



بما ان في الغالب متوسط اعمار الناس حوالي 70
فانهارده انا قضيت تلت مدتي على الكره الارضيه

بقالي 24 سنه عايش على الارض
يااااااااااااااه عمر طويل
لما الواحد يحسب برضه انه بينام بتاع 8 ساعات يوميا يعني تلت اليوم برضه
مش عارف ايه حكاية التلت دي :)
فبحسبه بسيطه سيادتي نمت 8 سنين كامله خلال ال 24 سنه دول
ياجماعه اي حد قسم رياضه يحسب ورايا عشان انا مش مقتنع
8 سنين نمتهم !!
لمأ أفكر في تقييم الفتره اللي فاتت هالاقي ان دا السن اللي المفروض ان الدنيا بتبني الانسان فيه
والفتره اللي جايه هيه اللي المفروض ادي الدنيا فيها
طب انا هادي الدنيا ايه
شغل في مجال معين بيفيد فئه معينه على نطاق محدود..
ولا اجوز واخلف عيلين تلاته وابقه كده ساهمت بدوري في منظومه اعمار الارض..
طب وبعدين .. ما الاف البشر عملوا كده
هيه دي اخرة الدنيا نشتغل ونخلف ونموت
اه فيه ناس عظيمه عملوا اختراعات واشتهروا على مستوى العالم
لكن معتقدش ان ممكن الامور تتطور وتوصل إني اختراع حاجه :)
بس مع ذلك انا مش راضي بالمستوى العادي دا من الدنيا
انا ملاحظ ان كلامي في مستوى عالي شويع من المثاليه.. اعذروني بس الواحد فينا بقا بيكتب مش
عارف القلم هايوديه فين..
طيب بلاش مثاليه
ارض الواقع بيقول
ان اصلا اللي يقدر يشتغل الوقتي في مصر
ويجوز ويخلف ويربي عياله
هايبزل مجهود وتفكير وحرق اعصاب وسهر ليالي مسهرهمش اللي اخترع القنبله الذريه
دا الشغل والزواج الوقتي في مصر ولا الجهاد في سبيل الله
بقه من ضمن الاحلام مع انه ابسط الحقوق العاديه
اللي الطبيعي انها تكون متوفره عشان تخش بقه في المرحله اللي بعديها
مرحله الانتاج الابداعي و التفكير على مستوى اعم واشمل من مجرد تلبيه احتياجاتك..
انا خايف لو ربنا امد لينا وليكم وطول في عمرنا
بعد 25 سنه نتقابل في بوست زي دا
و الاقي نفسي بكتب نفس الكلام عن اني مش عاوز مجرد اني اجوز واشتغل وعاوز اعمل حاجه مفيده..

لا يبقه الحق اعملي حاجه مفيده واجوز عشان بعد 25 سنه لو ملحقتش اعملي اللي في دماغي يبقه فيه امل
في اولادي انهم يعملوا اللي معملتوش..
سؤال على الماشي
انت بتحسب عيد ميلادك
على أساس اليوم الي اتولدت فيه
ولا اللي مكتوب في شهاده الميلاد ؟؟

هناك 31 تعليقًا:

no chance يقول...

هاابى برزداى تو يو


هاابى برزداى تو سامح

هاابى برزداى تو يو

هففففففففففففففففففففففففففففففففف


شوف يا حاج اولا كل سنة وانت طيب
ثانيا نتكلم بقى عن مصر
بس قبل منتكلم انا حاسس ان مصر الكلام كتر عنها اوى
المهم
بص ابوك وابويا عاشو فى البلد دى 70 و80
سنة ومفكروش فى التغيير الى انا وانت بنفكر فيه
كانو بيفكرو يخرجو الانجليز واليهود
احنا دلوقتى بنفكر نكون شعب ديموقراطى ودة عاوز اننا ندفع تمن زى اللى هما دفعوه
مش فى سنة ولا سنتين الدنيا هتتغير
بجد بصلها كدة
البلد دى عاوزة تضحيات كتير اوى
ومش هتنصلح بين يوم وليلة وعاوزة رجالة يدافعو عنها لما احنا نصدق مع نفسنا بجد هناخد وقتنا الطبيعى للتغيير وتاكد ان هيجى التغير



تقبل تحيااااااااااااتى

shreen يقول...

كل سنه وانت طيب يا سامح

واحسب عيد ميلادك من يوم ما اتولدت مش من يوم اللى مكتوب فى شهاده الميلاد

واحسب ميلادك من يوم ما لقيت توأم روحك
مش من يوم ما اتولدت

كل سنه وانت طيب
مره كمان

klmat يقول...

كل سنه وانت طيب وعقبال 100سنه
غريبه انا سنى مش صغير والحمد
لله ربيت اولادى كويس بس
كنت بفكر نفس التفكير حاسه انى
كان المفروض اعمل حاجه كبيره
ويكون لى بصمه ان شاء الله
تقدر انت تعمل كده انا فكرت كده متأخر اوى كان احلامى فى سنك الجواز والشغل والأولاد الحمد لله كلها اتحققت
فى اغنيه لوجيه عزيز رائعه اسمها المرايا
جميله اوى بتقول نفس المعنى ده
احييك على تفكيرك وربنا ينور بصيرتك
وتحقق اللى بتتمناه حقيقى مدونتك مميزه
ورائعه كل سنه وانت طيب عيد ميلادك
والعيد الكبير واحتفل باى تاريخ يعجبك
سلاااااااااااامى

Cleo يقول...

كل سنة وانت طيب يا سموحة وعقبال ما تقضى المدة كلها ونغنيلك يا نجف بنور :-)

أولا شغلك العادى اللى انت بتعمله ده جزء من إعمال الأرض.. النصيحة لوجه الله اللى ممكن تديها لحد إعمار للأرض.. الأمر بالمعروف.. النهى عن المنكر.. إماطة الأذى عن الطريق كل ده انت بتنفع بيه غيرك ويمكن تنقذ بيه حياة حد وانت مش عارف ومن أحيا نفسا فكأنما أحيا الناس جميعا..

بس انا أكتر حتة عجبتنى بتاعة اننا نمنا 8 سنين دى.. يا سلااااااااام... أتارينى دلوقتى بعانى من أرق مزمن :-)

ِِAdem El-Mahdy يقول...

سلام عليكم
اولا كل عام و انت الى الله اقرب و على طاعته ادوم

ثانيا : بالنسبة لموضوع الشغل فى مصر فيه شغل كتيير فى مصر بدليل الاعلانات المبوبة فى الاهرام الاسبوعى ، المشكلة دلوأتى فى القدرات بتاعنا معدتش على مقاس الاشغل
فحاول تشوف انت عاوز تشتغل فى ايه فى تشوف ايه المطاليب اللى محتاجاها الشغلانه

ثالثا : موضوع التغيير، ربنا سبحانه و تعالى بيقول :"إن الله لا يغير ما بقوم حتى يغيروا ما بأنفسهم ، شوف نفسك انت مقصر فى ايه مع ربنا و حاول تغيره صدقنى ربنا هيكرمك اوى سواء فى حياتك او شغلك او حتى عروستك "

و بس

و سلام عليكم

Unknown يقول...

no chance
هابي برزداوي تو يو تو

وانت بالصحه والسلامه

انا نفسي التغيير دا يحصل واحنا عايشين
اه اولادنا هيتفيدوا بيه
بس مش من حقنا يعني نشوف مصر بلد نضيفه قبل ما نموت

بس انت معاك حق ان التغيير عاوز رجاله
واحنا في زمن العمله دا نادره حبتين

خدلك حته جاتو بقه
ونورتني

Unknown يقول...

شيرين
كل سنه وانت بخير وسعاده وحب
معنى كلامك اني كده اتولدت مره واحده
ولسه التانيه
هممم طيب ربنا يعجل بالميلاد التاني
وافرحكم قريب ان شاء الله

شوفي تحبي ايه جاتو بالشكلاته
ولا جاتو بالشكلاته برضه
اختاري واللي تحبيه خديه

Unknown يقول...

كلمات
جزاكي الله كل خير
وربنا يفرحك بنفسك و باولادك دايما يارب
متحرمش من كلامك الرقيق و دعائك ليه
شكرا بجد
بتحسسيني كانك اختي الكبيره
لو عندك بنوته كبرهالي بقه وانا اجوزها
عشنا تبقي حماتي

:)

سائع ولا سخن .. كله موجود

Unknown يقول...

كليو
فكرتيني بالاغنيه الرائعه نجف بنور
ياااه الاغنيه دا ليها ذكريات ياما معايا
وقت مسمعها بحس اني عاوز احضن كل النجف اللي في بيتنا
:)

كل سنه وانت طيبه
على فكره
مش بس الشغل عبادده
النوم برضه عباده
يني ال 8 سنين دول مراحوش هدر

تحبي العصير في كبايه ولا بتستعملي شاليمو

Unknown يقول...

ادم حبيبي
وعليك السلام يارجل ورحمة الله وبركاته

وانت بالصحه و السلامه

انا متفق معاك
احنا لازم نتغير
على المستوى الفردي لازم نعلي قدراتنا عشان نلاقي شغل افضل
وعلى المستوى العام
مصر مش هاتتغير الا اذا احنا بقينا احسن

شكرا على مرورك الجميل

فيه اندومي تاخد ؟

رحــــيـل يقول...

مل سنه وانت طيب
ايوه كده خلينا نحتفل انت جبت التورته بس
طيب البلونات علينا
المهم شوف ياسامح
انا شخصيا لما بفكر فى الموضوع ده ومش بوصل لنتيجه
بتمنى شئ واحد فعلا انى اموت صغيره وانى موصلش للسن الى انتى بتحكى عليه
ببقى هتجنن كل لما اتخيل انى ممكن اقضى حياتى كده عادى
بس انت عارفه احلى حاجه ان يكون ليك هدف دنيوى مرتبط بالاخره كده بنكون مسكنا العصايا من النص
ربنا يوفقك يارب وتحقق كل امنياتك
اما بالنسبه للنوم فبصراحه انا بخده هروب اكتر منه اى حاجه تانيه عشان كده انا ممكن اكون نمت اكتر من تمن سنين ومش زعلانه عليهم فعلا احسن من انا كنت اقضيهم صاحيه
تحياتى

Unknown يقول...

رحيل

وانت بالصحه والسلامه يارحيل
حلو موضوع البلالين دا
بصي احنا في مركب ماشيه بينا
البديل الوحيد لرفض الامر الواقع هوه اننا نرمي نفسنا في البحر بس دا حرام
انا عن نفسي هحاول اخلي رحلتي في المركب بسيطه وسهله
اه نفسي ابقه راجل مؤثر في رحلة المركب
بس انا هعمل اللي عليه
واللي مكتوب ليه هشوفه وربنا يعيني ارضى بيه

نورتيني
وبلاش تنامي كتير

DayDreaming يقول...

كل سنه وانت طيب يا سامح وعقبال ما تحتفل معانا على نفس المدونه بالسنه الميه

بالنسبه لحساب يوم الميلاد فبصراحه انا بحسبه من يوم ما حسيت ان انا عايشه ومن يوم ما حسيت ان اليوم ده بيهم حد غيري

عموما بنتمنا كده بعد نص المدة نشوفك اخدت جايزة نوبل في اي حاجه تعجبك ان شالله حتى في كتابة البوست ده عشان متزعلش نفسك وتحس انك عملت حاجه :)باقي حاجتين

اولا : انا عايزه حتة من التورته بلاش الصور والحركات دي
ثانيا : جبت كلمه سامح اللي ع التورته دي منييييييييييييين؟؟؟

كل سنه وانت طيب مره تانيه
كل سنه وانت الى الله اقرب

Unknown يقول...

اميره
وانت بالصحه و السلامه
مرسي على زوقك

نوبل مره واحده
دا انت كريمه قوي

بالنسبه للتورته كومك محفوظ طبعا
هاعينه في الفريزر لحد ما اروح ليارا نبقى نستدعيكي تيجي تكليه
تعالي هنا انت مستكتره عليه يتعمي تورته عليها اسمي
كنتش اعرف انك بتكرهيني كده

وعلى العموم انا اللي كتبت بنفسي اسمي على التورته
هاغلب يعني
اتبسطي الوقتي لما قفشت نفسي
كل سنه وانت طيبه

مدحت محمد يقول...

كل سنة وانت طيب ياموحة
انت خلى بالك السنة الجاية هتبقى ربع قرن ان شاء الله
هانت
احسب عيد ميلادك طبعا
من يوم ماتولدت
افضل
انا بعتقد يوم ماتولدت هو اليوم اللى زرت فيه الكعبة
وحسيت ساعتها انى ربنا راضى عنى
خالص تحياتى
وعيد سعيد

Cleo يقول...

ميرسى بلاش عصير.. يا ريت أى حاجة مقفولة :p:

دكتور حر يقول...

سلامي للقرين سامح

ما كده بقينا عمر واحد بقى

كل سنه وانت طيب أولا
ويا عم
ايه بس التفاؤل الجامد قوي ده

عمر المؤمن يقاس باللحظات وليس بالأيام والسنين

أهم حاجه حالك مع ربنا
وسعيك في الدنيا

وابتغ فيما آتاك الله الدار الآخرة ولا تنس نصيبك من الدنيا


ان شاء الله هتفرج يا كبييييييير

ولك كل الود

دكتور حر يقول...

انا بحسب من نفس اليوم

ههو
هو

متسجل في اليوم اللي اتولدت فيه

Unknown يقول...

دوحا
وانت بالصحه و السلامه ياجميل

ربنا يكرمك
ويكرمني بزياره لبيت الله
يارب

Unknown يقول...

يابختك يادكتور
عيد ميلادك زي عيد ميلاد الحكومه
:)

افهم من ذلك انك قريب من عمري
طيب كويس
ياريت تتخصص عيون اهو نستنفع من وراك بحاجه
مهو انت اكيد لازم تعمل تخفيض للمدونين

شكرا لزيارتك وجزاك الله خير

Unknown يقول...

كليو
عندنا عصير مقفول برضه
:)

mohammad hamza يقول...

اولا طبعا ..
عيد ميلاد سعيد ..
بجد الواحد بدأيكره عيد ميلاده ..
كل سنة بتعدى الواحد يبصلها على انها سنة واتحرقت من حياته
انا بحاول افضل فى السن اللى انا عليه واللى يسألنى عن سنى .. احاول اصغر بسنة .. عشان ما اتحسرش على اللى فات ..
اسف بجد .. ماخدتش بالى من كلامى فطولت ..
الموضوع رائع

عين فى الجنة يقول...

ياسيدى اطال الله فى عمرك ومتعك بالصحة والعافية

اسامة يس يقول...

كل سنة وانت طيب مرتين ..
مرة للعيد ميلادك ومرة للعيد الكبيييييييير...

البوست جميل وفيه نوع من الرؤية الفلسفية مش بس المثالية يعني التساؤل عن الماهية ...؟
عن لماذا..؟
وعن الهدف..؟
اسئلة بصدق صعبه ومعقده اذا جردت وهو ما اسمته انت المثالية .. وصعبه ايضا اذا نزلنا بها على ارض الواقع... حيث كل شيء بشق الانفس يكون...
في النهاية حلوه الخاتمه هههههههههههه ان تلحق ان لم يكن نحن فليكن الاولاد..
جايز بردو ههههههههه
واهو امل

اخي العزيز سامح..
لك خالص الود والتحية

عــلاء ســالـــم يقول...

السلام عليكم

أولاً كل سنه وانت طيب وعقبال ما يبقوا 100 سنه مش 70 بس.

بالنسبه لكلامك
دا الشغل والزواج الوقتي في مصر ولا الجهاد في سبيل الله

فأنا شايف إن الجهاد أسهل بكتيييييييير وكمان أنفع في الدنيا والآخره.

كل سنه وانت طيب كمان مره بمناسبة عيد الأضحى.

عــلاء ســالـــم يقول...

بالنسبه لعيد الميلاد فأنا مكتوب في نفس اليوم وعلشان كده مش عارف الإحساس ده.
بس عموماً لما حد بيقولي على يوم ميلاده ويقولي إنه مكتوب في يوم غير اللي إتولد فيه بأسأله على اللي إتولد فيه فعلاً وهو دا اللي بأقوله فيه كل سنه وانت طيب.

do3aa يقول...

كويس اول مره ادخل مدونتك الاقى عيد ميلاد يلا بقى عايزه البيبسى ههههههه
كل سنه وانت طيب وعقبال 100 سنه
هاابى برز داى تو يو سامح
لما تحسب عيد ميلادك احسبه من الوقت اللى انت شايف ان الوقت ده انت اتولد فيه مع ان انا كل فتره بحس انى اتولد من جديد

سلامى ليك

Unknown يقول...

mohammed hamza
كل عام و انت طيب و بخير
وشكرا لمرورك



ragi
جزاك الله خير ومتعك بحياه سعيده



osama
اسامه كيف حالك
كل سنه وانت طيب ياجميل
مرتين
مره عشان العيد
ومره عشان عيد ميلادي

Alaa salim

ازيك ياعلاء
كل عام وانت بخير
انا خلاص هاستقر على اليوم اللي اتولدت فيه
مليش دعوه بالحكومه

Unknown يقول...

do3aa
ازيك يادعاء
كل سنه وانت طيبه
انا مبسوط بالتفائل اللي انت فيه
حلو ان الواحد يحس انه كل شويه اتولد من جديد

ملحوظه
هنا احنا بنشجع المنتج الوطني
ولذلك
نو بيبسي
بل يعيش عصير القصب يعيش

د/اجدع بنوته يقول...

سامح ياسامح

هابى بيرث داااى متاخره طبعا

بس ايه .. نايس تورته طبعا

سؤال وجيه ع فكره
انا 26/3
وتاريخ ميلادى الحكومى 2/5

وبقيس عمرى بالحقيقى طبعا م ساعة ان وطئت الارض

بس ايه مش كفايه كده تلت المده

متخرج بقى حسن سير وسلوك

هههههههههههههههههههههههههه

ربنا يديك طول العمر يارب وتأدى رسالتك كامله ف الحياه
م اعمار الارض لتدميرها باذن الله

منتا مش اخد بالك احنا بنعمرها وم الناحيه التانيه بندمرها

متتبسطش اوى بالرساله يعنى

يلا شد حيلك كده عايزين كمان 25 سنه ان شاء الله

ندخل نلاقى اولادك شايلين عنك حمل المدونه

Unknown يقول...

د/ اجدع بنوته

شكرا كتير ليكي
انا كنت بدعبس في المواضيع القديمه بالصدفه
لقيتك هنا مدمراني
قصدي منوراني
ربنا يخليكي