حنان الابن

الواد اياد ابني بدا معايا المقالب بدري

واقف على باب الشقه ونازل شغلي

ودي اللحظه الوحيده اللي بيحسسني فيها بالابوه

صحيح هي مصلحه عشان اشتاله واخرج بيه بره بابا الشقه وارجعه تاني على اساس انه كده اتفسح

بس كنت بفرح بيها ومبسوط

فانهارده بقا انا واقف على الباب ومستني جرعه حنان الابن

 وندهت ليه ودي جاي زحف بكل طاقته لانه لسه مش بيعرف يحبي

وخلاص قرب

وداخل عليه

وقرب

وخلاص انا مستني هايرفع ايده ليه ويبصلي وهو بيضحك عشان اشتاله

واذا بيه 

نفضلي احلا تنفيضه وراح عمال يلعب في الحذاء بتاعي وبيفك الرباط بتاعه

وانا فوق بقا مذهول بحسرتي 

ونزلت الشغل وانا فقدت اقوى وسيله كنت بضغط بيها على ابني عشان يحبني

تموت مكهرب ولا تموت شارب سم في عصير مانجه

مستحيل ادي صوتي لشفيق.

وفي نفس الوقت مش قادر ادي صوتي تاني للاخوان والاقيهم في البرلمان بيسقفوا للي قال على الثوار بلطجيه وقابضين فلوس وبيضربوا ترامادول وبيسقفوا لما يجي اسم المشير وسقفوا للجنزوري لما قلنالهم عليه لا وبعد كده رجعوا عرفوا اننا صح وان الجنزوري غلط.

يعني حرام نرجع تاني نضطر نختار فصيل بيهرتل في السياسه ولسه عمال يتعلم بالمحاوله والخطا ولما اديله صوتي يتغير ويقول انه معاه اغلبيه الشعب عاوزه.

وهو اصلا الشعب لا عاوزه ولا نيله, هو مش واخد باله اننا اخترناه من باب درء المفاسد وانه اختيار مابين شيئين احلاهما مر.

كان الله في عونا في هذا الاختيار الصعب. ما بين مجرم ومابين واحد شريف بس للاسف مكنش عنده مشكله يسقف ويطبل ويحط ايده ويتفق مع المجرم

خيانة

تاني هانرجع نختار يااخوان يافلول!!

انا مش هانزل تاني انتخب الاخوان لان ضميري مانعني اني اختار فلول, وفي الاخر الاقيهم بيتعاملوا مع الاغلبيه اللي خدوها بمنتهى الغرور وان دا اجماع شعبي عليهم.. وهو لا اجماع ولا نيله هو اختيار ما بين حاجتين كلامها مر, لكن بنختار تاني بمنطق قضى اخف من قضى..

او الاخوان لعبوا سياسه ولعبوا عشان مصر و عملوا تحالف مابين مرسي وصباحي وابو الفتوح, كرئيس ورئيس وزرا ونائب هانزل انتخب.

مكنش مش هقول هانزل انتخب الفلول, بس على الاقل مش هانتخب اصلا.

مراحل الانتخابات

ليه تتجوز أجنبية ؟

حيرة الانتخابات الرئاسية

الواحد مش عاوز يبقه سلبي تجاه الرئاسه بس

المجلس العسكري لو ناوي يسلم السلطه لرئيس وعارف انه هايتحاسب عمره مكان هايعمل مذبحه العباسيه وكشوف عذريه تاني

يعني الواحد متوقع بلاوي وربنا يستر.

لكن ضميري بيقولي ان مهم جدا جدا يكون فيه رئيس منتخب بنسبه شعبيه كبيره وليكي 60 او 70 % عشان لما المجلس العسكري يولع في البلد وننزل ميدان التحرير في الوقت دا يكون فيه قائد ليه شرعيه نعرف نقف وراه ونسانده,

مش زي ايام البرادعي نزلنا نقول يمسك المجلس الرئاسي والمجلس العسكري و باقي القوى قالو لا يفتح الله واشمعنه وباظ الموضوع.

فالرئيس مهم مش عشانه هايقدر يحل حاجه حاليا,لكن عشان نقف وراه لما الطوفان يجي, عشان كده محتاجين رئيس ثوري قوي شجاع. وانا مع ابو الفتوح وحمدين و خالد علي ايهم يكسب كويس. 

 وربنا يسترها عليكي يامصر