إياد.. حينما تتجدد الأحلام

قطعا تخيلتك كثيرا

ولكني لم اتوقع ان تكون بهذا الجمال

فأنت في عيني كما البدر

وفعلك في قلبي كما الخيال

جئتني يوم عرفات والناس لله يبتهلوا

فأمطرت السماء لدقائق فرحا والقلب مبتهج

وساعة ألتقت العينان كاني أراني

كأن الزمان قد عاد وعدت أرى طفولتي

اري برائتي.. اري الماضي

وفي ابتسامتك الرقيقة

ارى المستقبل

أدعوك ياربي ان تقر عيني بهذا الصبي

وأن تستعمله فيما تحب وترضى

-----------

فعلا شعور جميل لا يوصف

ويارب يعطي كل محروم

ويرزق الجميع بالخلف الصالح

وهنا هبطل رغي واسيب الصور تتكلم

صور اول مولود لي ابني  إياد 

إرادة الله ورغبة الشيطان

إرادة الله ورغبة الشيطان

أخبرنا الله أن الشيطان قال : قَالَ فَبِعِزَّتِكَ لَأُغْوِيَنَّهُمْ أَجْمَعِينَ [صـ : 82] فهذا هدف الشيطان وهذا ابتلاؤنا.
فإرادة الله أن اسلامنا أساسه واحد, مصدره واحد, كتب علىّ أن إذا دخلت مسجدا أن أصلي خلف الإمام أيان كان مذهبه وتوجهه الفكري أو السياسي, طالما هذا الإمام قال أنه مسلم فهذا يكفي, وكتب الله علىّ أن إذا صليت أن أساوي الصف وأسد الفرج بيني وبين من عن يميني وعن يساري, حتى لو كان عن يميني مسلم توجهه علماني ومن عن يساري مسلم توجهه سلفي.
كتب الله علينا الاتحاد, ففيه القوة, كتب الله علينا أن نجتمع ونتمسك بحبل الله ففيه نبعد عن الفرقه وعن الشتات. كتب الله وكانت إراده كذلك.
بالله عليك انظر إلى صورة صف يصلي لله في الحرم المكي أمام الكعبة, هل ترى من فارق؟
هل تستطيع أن تفرق لي بين السني و الشيعي والعلماني والصوفي والليبرالي أو الإخواني أو...
هذه إرادة الله ان يجمعنا في مشهد ننسى فيه أفكارنا ونتوحد حول لا إله الله, وصدقني, فهي تكفي.
ترى المسلمين تمسكوا بالقليل طالما جمعهم, وتركوا أي خلافات طالما شتتهم,
كتب الله علينا أن نتوحد, ولأنه يعلم أننا ضعفاء, وأننا ننسى, وأن الشيطان لنا بالمرصاد, لأنه خلقنا وهو أعلم بنا فلم يتركنا نتوه, بل علمنا كيف نتوحد وننسى ما بيننا من خلاف.
علمنا كيف نلبس زيا واحد,
علمنا كيف نجتمع خلف قائد واحد بأن نصلي خلف إمام واحد,
علمنا أن نكبر تكبيرة واحدة,
ونركع في نفس الوقت ونسجد له في نفس اللحظة,
علمنا أن نطوف في نفس الاتجاه,
بالله عليك هل رأيت في حياتك مثل هذا التنظيم, وهذا التناغم.
إن الصلاة والحج هي معلمة وشارحة لعموم المسلمين كيف يتوحدوا وكيف يتمسكوا بأقل القليل لكي لا يتفرقوا, وهذا الأقل القليل" وإن كان عند الله كثير" كافي لترى هذا التناغم وهذا الانتظام فترى ملايين المسلمين يصلون كأنهم رجل واحد.
والله إنها حجة علينا, إن لم نرى ونتعلم ما فيها.
سنُسأل: كيف اختلفتم وقد علمتكم أن تتوحدوا خمس مرات في اليوم, ألهذا الحد ينسى الإنسان!
سنُسأل كيف اقتتلتم وقد علمتكم كيف تقفون خلف إمام واحد, ألهذا الحد أغواكم الشيطان؟
كل يوم نصلي ونجتمع ونتوحد ونذوب في بعضنا, كأننا بنيان مرصوص, لذلك سنُسأل لم افترقنا واقتتلنا وكفّر بعضنا بعضنا, رغم أننا نصلي كل يوم, ونأخذ الدرس كل يوم.

اتحدوا يامسلمين يامن تصلوا, ولا تتفرقوا بعد أن تفرغوا من الصلاة, فتسبوا بعضكم بعضا في الفضائيات !!
اتحدوا يامصريين يامن كنتم في التحرير ولا تتفرقوا, فاتحادكم بارك الله فيه وايدكم, وأنتم أدرى بما ستفعله فيكم الفرقة..
لقد وحدنا والله ويحاول الشيطان أن يفرقنا كل يوم.
فلمن نسمع ونطيع؟

دعوه زفاف

انا مش معاهم الوقتي انا مع الناس التانين

بفضل الله تعالى
سوف انتقل من مرحه الناس التانين
ونروح للناس التانين الحلوين المجوزين
ادعوكم جميعا يوم 14/12 بعد يومين من عيد ميلادي
لحضور حفل زفافي
ربنا يتمه بخير ان شاء الله
ودعواتي للجميع بدوام السعاده والفرح ان شاء الله
وداعا ايتها العزوبيه
كم احببتك وكده
واخر دعوانا ان اللهم اجعل الزواج في ميزان حسناتنا يارب العالمين
LOL

مصر الجميلة

مصر الجميلة

إن لمصر وجهان تماما مثل ” خالد سعيد”…. وبالرغم من إصرار البعض على اقناعنا أن مصر وجهها مشوه ولم يعد به جمال، إلا أن الحقيقة ستظهر لا محال والصورة الأصلية الكل يعلم أن جمالها سينجلي يوما ما.

لو قلت عنها بلداً يجتمع فيه كل المتناقضات لما لامني أحد، فرغم ما تموج به مصر الان من أحداث كأنها في حالة مخاض لحياة جديدة الا أن هذه البلد حباها الله بجمال غير عادي، فلننسى قليلا مصر بتلوثها وفساد إدارتها وكوارثها التي لا تنتهي ولنأخذ جولة لمصر جميلة فاتنة..

مصر بريف يمتلئ بكل الالوان..

وصحراء رغم قساوتها الا انها لم تخلو من جمال..

ونيل يعطي بلا حساب..

وأثار مازلات تنبض بأن الذين بنوها قادرين على إعادة البناء..

ولنبدأ من الريف المصري:

منظر رائع لتجفيف التمر:

سلال التمر:

حصاد القمح:

ابراج الحمام في ميت غمر:

الدين الذي يربي الرحمة لا التعصب:

نهر النيل:

لا تتعجب انهم بالفعل يسلكون طريقا في النيل وسط نباتاته الكثيفة!

نهر النيل وحالة من الابداع:

واحة سيوة:

بحيرة ملح في واحة سيوه

جمال منقطع النظير في واحة سيوة

جزر في واحة سيوة

انقاض قلعه من القرون الوسطى في واحة سيوه

الصحراء البيضاء:

وفي المقابر عبرة ونظرة تأمل:

مقابر جنوب المنيا

مقابر في أسيوط

الآثار:

المسلة الغير مكتملة

هرم سستريس الثاني في الفيوم

أحد الأهرامات

قرية بجوار الاهرام

معبد ابو سمبل من بعيد

معبد الكرنك

معبد فيلة

وللبحر جمال و أسرار:

في بادئ الأمر لم أصدق أن هذا الكائن في مصر!

شعاب مرجانية وأسماك جميلة

جبال مصر

جزيرة تيران

كانت مقطتفات بعضها شاهده من قبل وبعضها تراه عيني لأول مره..

أنا متأكد أن كل بلد عربي به الكثير و الكثير من إبداع الخالق..

فهل يعوضنا ذلك ولو قليلا عن فساد المخلوق !؟

___________________________________________

بقلم: سامح إبراهيم العربي

المصادر: 1, 2, 3

الرجاء دعمي بضغط زر اعجبني من او ترك تعليق او بكلامهما
على هذا الرابط
http://www.ibda3world.com/%D8%B5%D9%...A%D9%84%D8%A9/

ولكم الاجر والثواب عند الله

انا مش معاهم الوقتي انا مع الناس التانين

ياأبناء شعب مدونتي العظيم
يسعدني أن أزف إليكم خبر هام
افرحوا فيه زي ما انتو عاوزين
خلاص بالامس انضممت لحزب الخاطبين
الربع قرن اللي فات دا كوم واللي جاي ان شاء الله دا كوم تاني
ونقول ايه مهما الواحد حاول يهرب محدش بيهرب من نصيبه
وفي النهايه ربنا بيكتب للواحد احسن مما هو متخيل او متوقع او حتى متمني
ربنا أكرمني ببنت الحلال
عقبال اللي مش في صباعه دبله منكم ما يلبس في صباعه دبله
واللي في ايده اليمين دبله تروح للشمال
واللي في ايده الشمال يشيل على دراعه التاني العيال
ربنا يسعدكم جميعا ويفرحكم زي ما فرحني
سلام بقا عشان ... احم ... مشغول

ولو أحببتك العمر ما يكفي في العمر في عينيك ثوان قليلة

الحمد لله

أصدقائي في عالم التدوين
بعدت عنكم فتره طويله
لكن غصب عني يعلم الله كم افتقدكم وافتقد وجودي بينكم
على هذه الصفحات نجتمع في مناسبات عده سعيده وفيه ايضا نتشارك الهموم والمواقف الصعبه
وهكذا الحياه بعض الاوقات السعيده التي تمر سريعا لا نكاد نلحظها
وكثير من الاوقات الصعبه التي تعلم الانسان الصبر و تكسبه خبره في مواجهه الحياه
لست اريد تقديم نصائح و سطور من الوعظ.. فلم اتحول فجاه لحكيم او رجل دين
ولكن هي مجرد اشاره لمواقف انسانيه لمستها بنفسي كان لها اكبر الاثرداخلي واحببت ان اشاركها معكم.
الحقيقه ليس أفضل من الله معرفة بالانسان فهو الذي خلقنا وقال عنا
{وَإِذَا أَنْعَمْنَا عَلَى الإِنسَانِ أَعْرَضَ وَنَأَى بِجَانِبِهِ وَإِذَا مَسَّهُ الشَّرُّ كَانَ يَؤُوساً }الإسراء83
وكثيرا ما وجدت هذه الايه بالفعل تنطبق علينا كبشر
كلما انعم الله على الانسان بنعم اعتبرها الانسان حق مكتسب وسعى باستعجاله البشري لغيرها وغيرها
ولا يكف الانسان يطلب ويطلب وكما يقال لا يملؤ عينه الا التراب
فاذا ما حبس الله عنه نعمه من هذه النعم .. اسودت الدنيا في وجهه وشعر ان الدنيا ولت ظهرها عنه
وساعتها يلجا الى الخالق يسأله من فضله ويتذلل في الدعاء ويتذكر ما مضى ويخشع قلبه راجيا كشف الغمه.
مهم جدا الانسان يكون راضي عن حاله باقتناع
فعلا يكون متاكد ان اي وضع هو فيه اكيد فيه خير
حتى لو الانسان فيها مش شايف دا او مش قادر يفهمه
لكن دايما حكمه ربنا بتكون اكبر مننا
واذا حصل للانسان ابتلاء يقول الحمد لله ان الابتلاء مش اكبر من كده
الحمد لله الابتلاء دا ممكن منع عني مصيبه اكبر مكنتش اعرفها
الحمد لله اني مسلم ولو صبرت واحتسبت ربنا بالابتلاء دا هايرفع عني سيئات كتير عملتها وما اكتر منها
الحمد لله الابتلاء دا عرفني ان ربنا مش سايبني لوحدي لا دا جنبي
ربنا وقت الابتلاء بيبعت للانسان بدل الاخ الشقيق عشره
وبيسهل ليك حاجات لما كنت بصحتك يمكن مكنتش بتخلص ولا بتعرف تعملها
وبيخليك تشوف احوال ناس حواليك تتاكد انك احسن من حالهم
وكمان بتعرف انك كنت في نعم كتير قبل كده عشان لما ربنا يفك عنك تعرف قد ايه انت كنت في وضع ممتاز.
انا شخصيا لما تعبت كان سهل ان أيأس و اتعب نفسيا
يعني المستشفيات حالها مش خافي على حد
و الاجراءات مش بتخلص
وحتى العلاج كتير بيبقه مش موجود لا في المستشفى ولا بره
وطبيعي تقلق من مستقبلك في الشغل
واكيد تقلق اكتر على مشاريعك للمستقبل
وغيرها من حاجات كتير ممكن الواحد يفكر فيها ويخليها ضغوط زياده عليه وعلى وضعه الصعب
بس لقيت ان اصلا ميصحش ان الواحد يفكر كده
لان لما يجي معاد الزياره والاقي اللي قدامي مجالوش حد وانا بتحايل على الناس متجيش عشان الزياره لتلاته بس يبقه دي نعمه
ولان لما يجي الليل والحمد لله قادر انام واللي جنبي تعبان وقدامه ليله طويله مش هينام فيها يبقه دي نعمه
ولما اكون عارف ان شويه راحه وعلاج وهابقه كويس واللي جنبي جه المستشفى لسه مش عارف هو تعبان من ايه ولا الدكاتره عارفين يبقه دي نعمه
ولما جمال شاب عنده 17 سنه يجي المستشفى تعبان ويتعمله اشعات وتحاليل وبدل الدكتور عشره يكشفوا عليه وكل حاجه تطلع سليمه
مع ان الواد تعبان جدا لا بينام ولا بياكل وحالته صعبه...
وفي الاخر في خامس يوم يموت قدامي وهو حتى متعالجش لان اساسا متعرفش هو تعبان من ايه يبقه الواحد لازم يقول الحمد لله
الحمد لله بجد لان اي حاجه غيرها الواحد حقيقي هايبقه مكسوف من ربنا
هيقول لربنا ايه انا تعبان .. مهو مش انا لوحدي
طب انا حالي صعب .. برضه مش لوحدي
طب اصل انا خايف من المستقبل.. ما قدامك شباب بيموت اصلا وانت لسه ربنا عاطيلك الفرصه تعيش وتكمل
حقيقي اللي يشوف بلاوي الناس تهون عليه بلوته
بس مش مجرد هوان نفسي لا دا حسبه بالعقل
ومش معنى كده الواحد يزهد في الدنيا ويعيش راهب .. ومخبيش عليكم بعد ما جمال اتوفى غصب عني لقتني بفكر بالشكل دا
لان كنت ارتبط بيه جامد واول مره اشوف حد بيموت قدامي
لكن ربنا مقلش كده
ربنا كل مده بيخليك تمر بموقف صعب عشان تقوى وتقدر تكمل
مش عشان تقف محلك سر وترجع لورا
بس المهم تكمل صح
وتعرف ان طول ما ربنا سايب انفاسك شغاله في صدرك يبقه دي هبه من الله
ونعمه لازم تستغلها طول ما هيه موجوده.
مطلوب مننا نشتغل وننجح ونتبسط ونبقه اغنيا ونفرح في الدنيا ونبقه احسن ناس .. بس بالشكل اللي يرضي ربنا و بالشكل اللي نتمتع بيه وناخد ثواب في نفس الوقت.
ومنجيش عند اول حاجه صعبه ونقول ليه يارب عملت فينا كده.لان كله خير حتى لو مش قادرين نشوف كده.
انا طولت عليكم بس انتو كلكم واحشني جدا جدا والله
وفي النهايه بدعيلكم جميعا ان ربنا يوفقكم في حياتكم ويجلعها كلها خير عليكم
ويحقق ليكم ما تتمننوا وينعم عليكم بالصحه و وقوة الايمان
ويعينكم جميعا على فعل الخير
لان فعل الخير دا نفحه من رحمه ربنا على بني البشر.
وبدعي في الاخر لمصر ربنا يزيح الغمه عنها لان المصريين خلاص شبعوا عز ورخاء ومحتاجين شويه تغيير.